بەيجىڭدەگى سايلاۋ ۋچاسكەسىنىڭ جابىلۋىنا 5 مينۋت قالعاندا دجاز انشىلەرى داۋىس بەردى - فوتو

بەيجىڭ. قازاقپارات - جەرگىلىكتى ۋاقىتپەن ساعات 20.00 (استانا ۋاقىتىمەن ساعات 18.00) قىتايدا ق ر پارلامەنتى ءماجىلىسىنىڭ سايلاۋىندا داۋىس بەرۋ اياقتالدى.

ساعات 19.55-دە سايلاۋ ۋچاسكەسىنە قازاقستاندا بەلگىلى «Da Gudda Jazz» حيپ- حوپ توبىنىڭ انشىلەرى ولجاس نۇرتازين (كرايم ۆولشەبنيك) جانە ارتەم كوروليەۆ (كارابين) كەلدى.

«الماتىدا تۇرامىز، الەمدى شارلاپ جۇرەمىز: رەسەي، ۋكراينا، قىرعىزستان، ەستونيا، لاتۆيا، مالايزيادا بولدىق. بەيجىڭگە ءۇشىنشى رەت كەلدىك. بۇل جولى شاڭحايدا ونەر كورسەتتىك، كەلەسى كۇنى بەيجىڭدە ەكى كونسەرت بەردىك. سايلاۋدا داۋىس بەرۋ مۇمكىندىگىنىڭ بار ەكەنىن ءبىلىپ، ونى پايدالانۋدى شەشتىك»، - دەدى قازاقپاراتقا بەرگەن سۇحباتىندا.

ەسكە سالا كەتسەك، «Da Gudda Jazz» ونەرىنە تابىنۋشىلاردىڭ سانى 700 مىڭ ادامنان اسادى.

«جەرگىلىكتى ۋاقىتپەن ساعات 20.00 ءبىزدىڭ №207 -سايلاۋ ۋچاسكەسى جۇمىسىن اياقتادى. سايلاۋ كوميسسياسىنىڭ مۇشەلەرى داۋىستاردى ساناۋعا كىرىستى. ناتيجە ورتالىق سايلاۋ كوميسسياسىنا جونەلتىلەدى»، - دەدى قازاقستاندىق جۋرناليستتەرگە بەرگەن سۇحباتىندا №207 -ۋچاسكەلىك سايلاۋ كوميسسياسىنىڭ ءتوراعاسى، ق ح ر- داعى ق ر ەلشىلىگىنىڭ كەڭەسشىسى ماناربەك قابازيەۆ.

ول سايلاۋشىلار، سونىڭ ىشىندە ستۋدەنتتەر داۋىس بەرۋدە بەلسەندىلىك تانىتقانىن اتاپ ءوتتى.