09:20, 10 - ناۋرىز 2016 | GMT +5
پينگۆين قۇتقارۋشىسىن كورۋ ءۇشىن 5 مىڭ ميل ءجۇزىپ وتەدى
استانا. قازاقپارات - برازيليالىق زەينەتكەر جواو پەرەيرا مەن دين- ديم ەسىمدى پينگۆيننىڭ وقيعاسى تۋرالى «DailyМail» باسىلىمى جازدى.
2011 - جىلى قاريا شاتقالداردان اشىعىپ، ءولىم اۋزىندا جاتقان كىشكەنتاي پينگۆيندى تاۋىپ الادى. ەگدە جاستاعى ەر ادام قۇستى تاماقتاندىرىپ، كۇتىپ، دين- ديم دەپ ات قويادى. ءال جيناعان سوڭ ونى ارگەنتينا جانە چيلي جاعالاۋلارىنا جونەلتتى.
جارتى جىلدان كەيىن دين- ديم قۇتقارۋشىسىن كورۋ ءۇشىن برازيلياعا قايتا ورالعان. بۇل وقيعا تالايدى تاڭقالدىردى.
جىلدىڭ سەگىز ايىندا قۇس قۇتقارۋشىسىنىڭ جانىندا بولادى، قالعان مەزگىلدە ۇرپاعىن كوبەيتۋ ءۇشىن چيليگە بارادى. جىل سايىن دين- ديم شامامەن بەس مىڭ ميل (سەگىز مىڭ شاقىرىمنان استام) قاشىقتىقتى باعىندىرادى. اتالعان قۇس ءتۇرى ءۇشىن بۇل رەكوردتىق كورسەتكىش.
