گولوۆكين-لەمە جەكپە-جەگى قارساڭىنداعى بارىنشا شىتىرمان 5 ساۋال
گولوۆكيننىڭ PPV- داعى دەبيۋتى ساتسىزدىككە ۇشىراپ جۇرمەي مە؟
گەننادي گولوۆكين ءوزىنىڭ سپورتتىق مانسابى جولىنداعى كەزەكتى جەكپە-جەگىن PPV- تا العاش رەت وتكىزبەك. ارينە، بۇل جايت قازاقستان بوكسشىسى ءۇشىن ءوزىنىڭ سپورتتىق مانسابى جولىنىڭ دامۋىنىڭ تابىستى كەزەڭى ەكەندىگى ءسوزسىز.
ويتكەنى، ەۋروپا مەن ازيا وكىلدەرىن ايتپاعاننىڭ وزىندە ءتىپتى امەريكاندىق بوكسشىلارىنىڭ ءوزى PPV- دا ونەر كورسەتۋى سيرەك. دەگەنمەن، GGG مەن ونىڭ قارسىلاسى داۆيد لەمە اراسىنداعى جەكپە-جەكتى ۇيىمداستىرۋشىلار ءوز تاراپتارىنان بارىنشا تاۋەكەلدى قادامعا بارىپ وتىرعانى شىندىق.
وزدەرىنىڭ شىعىندارىن جاۋىپ، بوكسشىلارعا سىياقى تولەۋمەن قاتار، پايدا دا تابۋ ءۇشىن نۆو ارناسى قاراپايىم امەريكاندىق ازاماتتار ترانسلياتسيانى كورۋ قۇقىعىن ساتىپ الادى دەپ ۇمىتتەنۋدە. ول ءۇشىن امەريكاندىقتار 70 دوللاردان تولەۋى ءتيىس. ال بۇعان دەيىنگى تاجىريبە مەن ستاتيستيكا كورسەتكەندەي، امەريكاندىقتار بۇرىنعى ك س ر و- دان شىققان بوكسشىلاردىڭ شارشى الاڭداعى ايقاسىن كورۋ ءۇشىن امياندارىنان اقشا شىعارۋعا تىم اسىعا قويمايدى.
ايتا كەتەرلىگى، گەننادي گولوۆكين PPV- دا جەكپە-جەگى كورسەتىلەتىن ت م د- دان شىققان ءۇشىنشى بوكسشى بولماق. ەستە بولسا، 2004-جىلى ۋكرايندىق ۆيتالي كليچكو PPV- دا ەڭ ءبىرىنشى بولىپ شارشى الاڭعا كوتەرىلگەن ەدى. ول دەنني ۆيليامسقا قارسى شىققان-دى. ودان كەيىن قازاقستاننىڭ بوكس مەكتەبىنەن ءتالىم-تاربيە العان ولەگ ماسكايەۆ حاسيم راحمانمەن ايقاسقان بولاتىن. دەگەنمەن، بۇل جەكپە-جەكتەردەگى PPV- كورسەتكىشتەرى تىم از، ياعني 120 مىڭ مەن 60 مىڭ كورەرمەندى عانا جيناي الدى.
ۇيىمداستىرۋشىلار ءۇشىن بۇل جايت قۇردىمعا كەتۋمەن تەڭ. ايتپاقشى، مۇنداي جۇيەدە تابىس اكەلگەن ت م د- دىلىق بوكسشى كوستيا سزيۋ بولعانى ەستە. ءبىراق، ونىڭ شارشى الاڭداعى كەزدەسۋى ا ق ش- تا ەمەس، اۆستراليادا PPV- دا كورسەتىلگەن ەدى.
ۇيىمداستىرۋشىلار بۇل جەكپە-جەكتى كورۋ ءۇشىن كەمىندە 250-300 مىڭ بىرەگەي پايدالانۋشى اقشا تولەيدى دەپ ۇمىتتەنۋدە. ەگەر اقىلى ترانسلاتسيا كورۋشىلەردىڭ سانى بۇل كۇتىلەتىن دەڭگەيدەن تومەن بولسا، وندا گ. گولوۆكيننىڭ PPV- داعى دەبيۋتى ساتسىزدىككە ۇشىرادى دەۋگە بولادى.
گ. گولوۆكين د. لەمەمەن جەكپە-جەگى ءۇشىن قانشا گونورار الادى؟
بۇل ساۋالدىڭ جاۋابى ءبىرىنشى ءسوز ەتكەن ماسەلەمىزگە تىكەلەي بايلانىستى. ياعني، گولوۆكيننىڭ دە، ونىڭ قارسىلاسىنىڭ دا گونورارىنىڭ كولەمى تىكەلەي امەريكاندىق ازاماتتاردىڭ قولىندا. قازاقستاندىق پەن كانادالىقتىڭ شارشى الاڭداعى ايقاسىن تاماشالاعىسى كەلگەن ادامداردىڭ لەگى كوبەيگەن سايىن بوكسشىلاردىڭ بانكتەگى ەسەپشوتتارىنا قۇيىلاتىن قارجى دا ارتا تۇسەدى.
ارينە، ناقتى بەلگىلەنگەن ستاۆكا دا بار. بۇل رەتتە ونىڭ كولەمى شامامەن 2 ميلليون دوللاردى قۇرايدى. ءبىراق، مۇنداي جاعدايدا ەكى تاراپ تا ونىڭ كولەمىنە كوڭىلدەرى كونشي قويۋى نەعابىل. ءتىپتى، جەكپە-جەك 250-300 PPV جينايتىن بولسا، وندا جالپى پايدانى ەسەپتەپ شىعارۋ قيىن ەمەس. ماسەلەن، 250 مىڭدى 70 دوللارعا كوبەيتسەك، وندا 17,5 ميلليون دوللار شىعادى. بۇل سومانىڭ جارتىسىنا جۋىعى PPV- وپەراتورعا كەتسە، ال قالعان جارتىسى بوكسشىلار مەن پروموۋتەرلەرگە بۇيىرادى. سونىمەن قاتار كانال دا ءبىراز قارجىنى قالتاسىنا باسادى.
ءتىپتى، كورسەتىلىم ساتىلىمى 200 مىڭدى ماڭايلاعاننىڭ وزىندە بۇل كەپىلدەندىرىلگەن گونوراردى تولەۋمەن قاتار بوكسشىلارعا قوسىمشا سوما اۋدارۋعا دا جەتكىلىكتى. دەمەك، جاعداي ءدال وسىلاي ءوربيتىن بولسا، گولوۆكين مەن لەمە 4-5 ميلليون دوللاردى ءبولىپ الادى دەگەن ءسوز. ال ەگەر جەكپە-جەكتى اقىلى نەگىزدە كورۋشىلەردىڭ سانى 300 مىڭعا بارسا، وندا بوكسشىلار شامامەن 7 ميلليون دوللاردى بولىسەدى.
مۇنان بولەك، ترانسلاتسيا تەك جالعىز تابىس كوزى ەمەس ەكەندىگىن دە ەستەن شىعارماۋ كەرەك. ياعني، بيلەت ساتۋدان تۇسەتىن دە كىرىس بار. الدىن الا ەسەپتەۋلەر بويىنشا ول شامامەن 1 ميلليون دوللاردى قۇرايدى.
سونىمەن بۇل ساۋالدى تۇيىندەي كەلە گ. گولوۆكين وسى جولعى جەكپە-جەگىندە رەكوردتىق گونورار عانا الىپ قويماي، بۇعان دەيىنگى كىشى ۆيللي مونرومەن ايقاسى ءۇشىن العان سىياقىسىنىڭ سوماسىنان ءبىرشاما ارتىق قارجىنى قالتاسىنا باساتىندىعىن 99,999 پايىز سەنىممەن ايتۋعا بولادى.
گ. گولوۆكين 4 بەلبەۋدى توپتاستىرا الا ما؟
گەنناديي گولوۆكين مەن داۆيد لەمە اراسىنداعى جەكپە-جەك چەمپيوندىق تيتۋلدار تۇرعىسىندا دا زور سپورتتىق شىتىرمانعا تولى. وزدەرىڭىز-اق ويلاپ كورىڭىزدەرشى: جەكسەنبى كۇنى داڭقتى «مەديسون- سكۆەر-گاردەن» سپورت كەشەنىندە ورتا سالماقتاعى ءتورت بىردەي بەلبەۋ ساراپقا سالىنباق. WBC نۇسقاسى بويىنشا ۋاقىتشا چەمپيون، WBA نۇسقاسى بويىنشا سۋپەرچەمپيون جانە IBO نۇسقاسى بويىنشا چەمپيون تيتۋلدارىنا يە گ. گولوۆكين IBF بەلبەۋىنە يەلىك ەتكەن قارسىلاسىمەن ايقاسقا تۇسپەك. ياعني، كانادالىقتىڭ بۇل جولى ءباسى باسىم بولسا، وندا ول قازاقستاندىق بوكسشىنىڭ 3 بەلبەۋىنە بىردەن يەلىك ەتەدى.
ال بارلىق بەلبەۋلەردى توپتاستىرۋ باستى ارمانى ەكەندىگىن بىرنەشە مارتە ايتقان گ. گولوۆكين بولسا، ءوز كوللەكسياسىن IBF بەلبەۋىمەن تولىقتىرۋعا اسىعىپ جۇرگەنى ايدان انىق جايت. سوندىقتان الداعى جەكپە-جەكتىڭ باستى ساۋالى بىلاي وربىسە وتە ورىندى: جەڭىلىپ كورمەگەن گ. گولوۆكين ءوز كوللەكسياسىن IBF نۇسقاسى بويىنشا الەم چەمپيونىنىڭ ءتورتىنشى بەلبەۋىمەن تولىقتىرا الا ما؟
بوكسشىلاردىڭ ۇرىس مانەرى قانداي بولماق؟
گولوۆكين مەن لەمەنىڭ جۇدىرىقتاسۋ ماسەلەلەرى جەكپە-جەك قارساڭىندا بارىنشا شىتىرمان ساۋالداردىڭ ءبىرى بولىپ وتىر. ويتكەنى، ەكەۋى دە وزدەرىنىڭ قۋاتتى سوققىلارىنا باسىمدىق بەرە وتىرىپ، ۇرىستىڭ شابۋىلداۋشى ستيلىنە باسا ءمان بەرەتىندىگى بەلگىلى. GGG سوققىسىنىڭ اۋىرلىعىنىڭ قانشالىقتى قۋاتتى ەكەندىگىن ءبىز ولاردىڭ اۋىزدارىنان تالاي ەستىگەن ەدىك. ەستە بولسا، ەكىنشى ورتا سالماقتاعى WBA جانە IBF چەمپيونى كارل فروچ نۆو تەلەارناسىن بەرگەن سۇحباتىندا گەنناديدىڭ سوققىسىن اتتىڭ تەبىسىنە تەڭەپ، ودان اۋلاق جۇرۋگە شاقىرعانى بار ەدى.
كانادالىقتىڭ دا سوققىسى جويقىن. ءبىراق، لەمە قازاقستاندىق بوكسشىمەن جۇدىرىقتاسۋ بارىسىندا ءجيى شابۋىلعا بوي الدىرۋ وزىنە قانشالىقتى قاۋىپتى ەكەندىگىن جاقسى بىلەدى. سەبەبى، داۆيد شابۋىلعا شىققاندا قورعانىستى ۇمىتىپ كەتەتىنى بار.
گەنناديدىڭ باستى قارۋى دجەب سوققىسى دەسەك بولادى. كوپتەگەن مامانداردىڭ پىكىرىنشە، گولوۆكيننىڭ دجەبى قازىرگى بوكسشىلاردىڭ اراسىندا ەڭ ۇزدىگى سانالادى. سوندىقتان دا بۇل كەزدەسۋدە لەمە ءوزىنىڭ ماقامىمەن ۇرىس جۇرگىزە الا ما الدە نوكاۋتقا تۇسۋدەن جاسقانىپ، تاس-قامال قورعانىستا جۇرە مە، دەگەن ساۋال كولبەڭدەيدى.
ءدال وسىنداي ساۋالدى گولوۆكينگە دە قويۋعا بولاتىن سياقتى. ەستە بولسا، بۇعان دەيىنگى كىشى مونرومەن اراداعى جەكپە-جەكتە قازاقستاندىق بىرنەشە اۋىر سوققىنى جىبەرىپ العان-دى. باقىتىمىزعا وراي مونرونىڭ سوققىسى تىم اۋىر بولماعاندىقتان گەنناديگە ايتارلىقتاي پروبلەما تۋىنداماعان ەدى. ال لەمەنىڭ سوققىسى جويقىن. سول سەبەپتى ابەل سانچەس ءوز شاكىرتىن كانادالىقتىڭ تىكەلەي سوققىسىن جىبەرمەۋگە كەڭەس بەرەتىندىگى ءسوزسىز.
گ. گولوۆكين قاي راۋندتا مەرزىمىنەن بۇرىن جەڭىسكە جەتەدى؟
سوڭعى ساۋال ءسال دورەكىلەۋ ەستىلگەنىمەن، سوڭعى ۋاقىتتا ءوزىنىڭ سەنىمدى جەڭىستەرىمەن گەننادي گولوۆكين جانكۇيەرلەرىن ءدال وسى ساۋال توڭىرەگىندە ءتۇرلى بولجامدار جاساۋعا ۇيرەتىپ قويعانى بار. ماسەلەن، قازاقستاندىق بوكسشىمەن جۇدىرىق تۇيىستىرگەن يشيدا، ماكلين جانە گيل ءۇشىنشى راۋندتان ارى اسا المادى. ال رۋبيو بولسا، ءتىپتى ءۇشىنشى راۋندقا دا ىلىگە الماي قالعان بولاتىن. ال كىشى ۆيللي مونرونىڭ ولارعا قاراعاندا ءبىرشاما تەگەۋىرىن كورسەتكەنى بار. دەگەنمەن، ول دا 6- راۋندا گەنناديدىڭ اۋىر سوققىسىنان كەيىن ەستەن تانعان ەدى. قازاقستاندىق بوكسشىلاردىڭ جوعارىدا اتاپ وتكەن قارسىلاستارىنا قاراعاندا بريتاندىق مارتين ميۋررەي تەگەۋىرىندى، تاباندى بوكسشى ەكەنىن كورسەتە العان سياقتى.
ول 11 راۋند بويى قازاقستاندىق بوكسشىنىڭ اۋىر سوققىلارىنا شىداعان بولاتىن. ايتپاقشى، نۆو تەلەارناسىنا بەرگەن سۇحباتى بارىسىندا ابەل سانچەس شاكىرتىنىڭ قارسىلاسىن ءتورتىنشى راۋندتا نوكاۋتقا جىبەرەتىندىگىن ايتىپ ەدى.
اۆتور: مارلان جيەمباي
