قىزىلوردا وبلىسىندا ءبىرىنشى جارتىجىلدىقتا 5 مىڭنان استام جاڭا جۇمىس ورنى اشىلعان

قىزىلوردا. قازاقپارات - قىزىلوردا وبلىسى اكىمدىگىندە ءبىرىنشى جارتىجىلدىقتىڭ قورىتىندىسى بويىنشا كەڭەيتىلگەن ءماجىلىس ءوتتى.

التى ايدى قورىتىندىلاعان وبلىس اكىمى قىرىمبەك كوشەربايەۆ قازىرگى ەكونوميكالىق جاعدايعا قاراماستان وبلىستا الەۋمەتتىك-ەكونوميكالىق دامۋدىڭ نەگىزگى سالالارى بويىنشا كورسەتكىشتەر جاقسى ەكەنىن ايتتى.

مىسالى، وبلىستا تۇتىنۋشى باعالار يندەكسى ورتاشا رەسپۋبليكالىق دەڭگەيدەن تومەن، تۇرعىنداردى جۇمىسپەن قامتۋ بويىنشا جاعداي تۇراقتى، ال سالىق ءتۇسىمى بويىنشا وبلىس باسقا وڭىرلەر اراسىندا ءبىرىنشى ورىندا. سونداي-اق، جىل سوڭىنا دەيىن 1800 پاتەر پايدالانۋعا بەرىلەدى دەپ جوسپارلانۋدا.

وبلىستىڭ ءبىرىنشى جارتىجىلدىقتاعى الەۋمەتتىك-ەكونوميكالىق دامۋ قورىتىندىسى بويىنشا وبلىس اكىمىنىڭ ورىنباسارى ناتاليا گودۋنوۆا بايانداما جاسادى. ونىڭ ايتۋىنشا، ونەركاسىپ كولەمىنىڭ جالپى تومەندەۋىنە قاراماستان، ءوندىرىستىڭ كەيبىر سالالارىندا ءوسىم بايقالادى.

ەت-ءسۇت ونىمدەرىن ءوندىرۋ كولەمى ۇلعايعان، تۇرعىنداردىڭ تابىستارى مەن جەكە تۇلعالاردىڭ دەپوزيت كورسەتكىشتەرى دە ايتارلىقتاي ءوستى. العاشقى جارتىجىلدىقتا 5 مىڭنان استام جاڭا جۇمىس ورنى اشىلدى. جۇمىسسىزدىق دەڭگەيى 5 پايىزدى قۇرادى. وتكەن جىلدىڭ وسى مەرزىمىمەن سالىستىرعاندا قۇرىلىس سالاسىندا دا ايتارلىقتاي دامۋ بار. قازىرگى تاڭدا وبلىستا 23 مەكتەپتىڭ قۇرىلىسى جۇرگىزىلۋدە، ونىڭ ىشىندە 18 ءبىلىم ورداسىن اعىمداعى جىلى اشۋ جوسپارلانۋدا. ودان بولەك، ءوڭىردىڭ ورتا ءبىلىم بەرۋ سالاسىنداعى وڭ وزگەرىستەردى ەرەكشە اتاپ وتكەن ءجون. ۇلتتىق ءبىرىڭعاي تەستىلەۋدى تاپسىرۋ كورسەتكىشتەرىن ايتارلىقتاي جاقسارتىپ،  قىزىلوردا وبلىسى رەسپۋبليكادا 5-ورىن يەلەندى.

سونداي-اق، وبلىستىڭ جارتىجىلدىق دامۋ قورىتىندىسى بويىنشا وبلىس اكىمىنىڭ ورىنباسارى سەرىك قوجانيازوۆ جانە ءبىرقاتار مەملەكەتتىك ورگان باسشىلارى بايانداما جاسادى. ايماق باسشىسى وبلىس ەكونوميكاسىن نىعايتۋ جانە الەۋمەتتىك-ەكونوميكالىق دامۋ كورسەتكىشتەرىن جاقسارتۋ بويىنشا جاۋاپتى باسشىلارعا ءبىرقاتار تاپسىرمالار بەردى.