ەلوردادا 5 مىڭنان استام ادام «مەنىڭ قازاقستانىم - مەنىڭ استانام!» شاراسىنا قاتىسىپ جاتىر - فوتو
شارا «ماڭگىلىك ەل» سالتانات قاقپاسىنان اۆتوكەرۋەنمەن باستالىپ، ورتالىق كوشەلەردە جالعاستى.
شاراعا قاتىسقان ەسترادا جۇلدىزدارى مەن بەلگىلى سپورتشىلار ەستافەتا رەتىندە قازاقستاننىڭ بايراعىن ءبىر نىساننان ەكىنشىسىنە كوشىرەدى. نەگىزگى مەرەكەلىك شارا ورتالىق ساياباقتا وتەدى. وندا قاتىسۋشىلار بىرىگىپ، قازاقستان رەسپۋبليكاسىنىڭ ءانۇرانىن شىرقايدى.
«قازاقستاندىق پاتريوتيزمنىڭ نەگىزى پرەزيدەنتىمىز نۇرسۇلتان نازاربايەۆتىڭ «ماڭگىلىك ەل» يدەياسى بولعاندىقتان، شارا سالتانات قاقپاسىنان باستالدى. اۆتوشەرۋگە قازاقستاندا وندىرىلگەن كولىكتەر قاتىستىرىلدى. شارا ەسىل وزەنىندە جالعاسادى، ۇلكەن كونسەرتتىك باعدارلاما جوسپارلانعان»، - دەدى استانا قالاسى جاستار ساياساتىن قولداۋ مەملەكەتتىك قورىنىڭ ديرەكتورى باقىتجان جۇنىسبەكوۆ.
ونىڭ سوزىنە قاراعاندا، بۇل كۇنى استانادا پاتريوتيزم يدەياسىن ناسيحاتتايتىن ءتۇرلى شارالار ءوتىپ جاتىر.
«كەشە عانا ۇلكەن عىلىمي- پراكتيكالىق كونفەرەنسيا ءوتتى، سونىمەن قاتار بەلگىلى قوعام قايراتكەرلەرىنىڭ قاتىسۋىمەن سەمينارلار، دارىستەر، دوڭگەلەك ۇستەلدەر ءوتىپ جاتىر»، - دەدى ب. جۇنىسبەكوۆ.
ايتا كەتەيىك، «مەنىڭ قازاقستانىم - مەنىڭ استانام!» پاتريوتتىق اكسياسى وسىمەن ءتورتىنشى رەت ءوتىپ جاتىر.
