الماتى وبلىسىندا 5 مىڭ توننا جەمىس قويماسى ىسكە قوسىلماق

تالدىقورعان. قازاقپارات - اعىمداعى جىلى الماتى وبلىسىنىڭ ەڭبەكشىقازاق اۋدانىندا «ينتەگراتسيا تۋرگەن» كومپانياسىنىڭ جەمىس- كوكونىس وڭدەۋ زاۋىتى مەن جەمىس قويماسىن ىسكە قوسۋ جوسپارلانعان.

 بۇل تۋرالى حالىققا جانە الماتى وبلىسىنىڭ اكىمى اماندىق باتالوۆقا ەسەپ بەرۋ جيىنىندا اۋدان اكىمى بينالى ىسقاق حابارلادى.

وبلىس اكىمىنىڭ باسپا ءسوز قىزمەتى حابارلاعانداي، جەمىس ساقتاۋ قويماسى 5 مىڭ توننا ونىمگە ارنالعان. جوسپارلانعان ينۆەستيا - 2,7 ميلليارد تەڭگە. جوبا اياسىندا 30 ادام جۇمىسپەن قامتىلادى.

بۇدان باسقا، بينالى ىسقاق يننوۆاتسيالىق تەحنولوگيامەن الما، باسقا دا جەمىستەردى ودان ءارى قايتا وڭدەي وتىرىپ، باقشا وتىرعىزۋمەن اينالىساتىن «استانا فرۋتس» فيرماسى ىسكە قوسىلعانىن اتاپ ءوتتى. جوبا قۇنى 600 ميلليون تەڭگە، 50 جۇمىس ورنى قۇرىلادى دەپ كۇتىلۋدە. بولەك اۋىلىندا «اگرومەركۋر» كومپانياسى 800 باس مالعا ءىرى بورداقىلاۋ بازاسىن، سونداي- اق وزىق يزرايلدىك تەحنولوگيا بويىنشا  1200 باس مالعا ارنالعان ءسۇت- تاۋارلىق فەرماسىن سالۋ جوباسىن ىسكە اسىرادى.

سونداي- اق ءۇشىنشى كەزەكتە ەسىك گ ە س، سونداي- اق تۋرگەن گ ە س- ءىن سالۋ جانە پايدالانۋعا ەنگىزۋدى اياقتاۋ جوسپارلانۋدا.

كەزدەسۋ قورىتىندىسىندا وبلىس اكىمى اماندىق باتالوۆ ءسوز سويلەدى.

«ەكونوميكا دامۋىنىڭ باستى كورسەتكىشتەرىنىڭ ءبىرى - ونەركاسىپتىك ءونىم كولەمى. ەڭبەكشىقازاق اۋدانى - الەۋەتى بار ۇلكەن اۋدانداردىڭ ءبىرى. مەملەكەت باسشىسى اتاپ وتكەندەي، اۋدانداردىڭ سايكەسسىزدىگىن ازايتۋىمىز قاجەت. بۇل جاعىنان ەڭبەكشىقازاق اۋدانى ىلە جانە قاراساي اۋداندارىنان وزىق بولۋى ءتيىس. بۇل رەتتە اۋىل شارۋاشىلىعى ونىمدەرىن قايتا وڭدەۋگە باسا نازار اۋدارعان ءجون. قازىر اۋدان 13 پايىز اۋىل شارۋاشىلىعى ءونىمىن بەرەدى. وسى باعىتتا جۇمىستى جانداندىرۋ كەرەك»، - دەپ اتاپ ءوتتى ءوڭىر باسشىسى.