ايەل ءۇشىن اۋىلداسىن ولتىرگەن 59 جاستاعى ەسىل اۋدانىنىڭ تۇرعىنى الداعى 13 جىلىن قاتاڭ رەجيمدى تۇزەۋ كولونياسىندا وتكىزبەك
بۇل تۋرالى وبلىستىق پروكۋراتۋرانىڭ باسپا ءسوز قىزمەتىنەن حابارلادى.
پروكۋراتۋرانىڭ مالىمەتى بويىنشا 2014 -جىلدىڭ 30 -جەلتوقسانىندا تاڭعى ۋاقىتتا ەسىل اۋدانى بىرلىك اۋىلىنىڭ 59 جاستاعى تۇرعىنى ماس كۇيىندە وزىمەن بۇرىن بىرگە تۇرعان ايەلدىڭ ۇيىنە بارعان.
ال، ايەل بولسا، ونىمەن اجىراسقاننان كەيىن سول اۋىلداعى باسقا ەركەكپەن تۇرىپ جاتقان. وسى ايەل ءۇشىن اۋىلداس ەكى ەر ادامنىڭ اراسىندا ءجيى كيكىلجىڭ بولىپ تۇرىپتى. سونداي ءبىر ءساتتى اراققا سىلقيا تويىپ العان 59 جاستاعى ەر ادام ءوزىنىڭ بۇرىنعى ايەلى مەن ونىڭ قازىرگى كۇيەۋىنىڭ ۇيىنە بارىپ، توسەكتە ەكەۋى ۇيىقتاپ جاتقان كەزدە ەر ادامدى باسىنان بالتانىڭ قىرىمەن سالىپ جىبەرگەن. ول سول جەردە جان ءتاسىلىم ەتكەن. وسى وقيعانىڭ كۋاسى بولعان ايەل بىردەن پوليتسيانى شاقىرعان. ال، ءوزىنىڭ بۇرىنعى ايەلىن قازىرگى كۇيەۋىنەن تارتىپ الماق بولعان 59 جاستاعى ەر بولسا، ءوزىنىڭ ۇيىنە بارىپ قۇقىق قورعاۋ ورگاندارىنىڭ قىزمەتكەرلەرىنىڭ كەلەتىنىن كۇتكەن.
2015 -جىلدىڭ 21 -ساۋىرىندە اقمولا وبلىسىنىڭ قىلمىستىق ىستەر بويىنشا مامانداندىرىلعان اۋدانارالىق سوتى ادام ولتىرگەن بىرلىك اۋىلىنىڭ 59 جاستاعى تۇرعىنىن كىنالى دەپ تانىپ، قاتاڭ رەجيمدى تۇزەۋ كولونياسىندا 13 جىلعا باس بوستاندىعىنان ايىرۋ تۇرىندە جازا تاعايىندادى.
الايدا، كىنالى ۇكىممەن كەلىسپەي قىلمىس جاساعان ساتتە مەرت بولعان ادامنىڭ ونىڭ قۇقىنا قارسى جانە وعاش قىلىق كورسەتكەنىن، ادام ولتىرۋگە ىشكى تولقۋ كۇيىندە بارعانىن ايتىپ سەندىرمەك بولدى.
اقمولا وبلىستىق سوتىنىڭ اپەللياتسيالىق القاسى 2015 -جىلدىڭ 17 -شىلدەسىندە ءىس ماتەريالدارىن جانە شاعىم دالەلدەرىن زەردەلەپ، سوتتالعاننىڭ كىسى ءولتىرۋ نيەتى كەنەتتەن تۋىنداماعان جانە ول ءوز ارەكەتتەرىنىڭ ناقتى سيپاتىن جانە قوعامدىق قاۋپىن تۇسىنگەن دەگەن قورىتىندىعا كەلگەن. وسىعان بايلانىستى، وبلىستىق سوت سوتتالعاننىڭ شاعىمى نەگىزسىز دەگەن قورىتىندىعا كەلدى، سوندىقتان سوت ۇكىمىن كۇشىندە قالدىردى»، دەپ كورسەتىلگەن حابارلامادا.
اۆتور: اسلان وسپانوۆ
