قازاقستاندا جۇزدەن اسقان 570 قاريا بار

استانا. قازاقپارات - 1- قازان كۇنى قازاقستاندا ءداستۇرلى تۇردە قارتتار كۇنى تويلانادى. «ۇكىمەت - ازاماتتار ءۇشىن» مەملەكەتتىك كورپوراتسياسى قارتتار مەن زەينەتكەرلەرگە قۇرمەت كورسەتتى.

 ەلدەگى 14 وڭىردە جانە استانا مەن الماتى قالالارىندا مەيرامعا ارنالعان ءتۇرلى ءىس- شارالار ءوتتى، دەپ حابارلادى مەملەكەتتىك كورپوراتسيانىڭ باسپا ءسوز قىزمەتى.

استانادا «ۇكىمەت - ازاماتتار ءۇشىن» قىزمەتكەرلەرى جۇماش شايامانوۆاعا قوناققا باردى. مەرەكە قارساڭىندا جۇماش اجەي 100 جاسقا تولدى. جۇماش اجەيدىڭ تاعدىرى وتكەن عاسىردا تۋعان ادامداردىڭ تاعدىرىمەن ۇقساس. اقمولا وبلىسىنىڭ تۋماسى جۇماش اجەي سوعىس جىلدارى تىلدا ەڭبەك ەتتى، كولحوزدا ساۋىنشى بولىپ جۇمىس ىستەدى. سوعىس جىلدارى تۋىستارى مەن جاقىندارىن جوعالتىپ العان ول 1960 -جىلى ءوز اناسى مەن اپكەسىمەن قاۋىشادى. 80-جىلداردىڭ باسىندا جۇماش اپاي سەلينوگرادتاعى بالالارىنا كوشىپ كەلەدى. بۇگىندە ول 4 ۇلىنان 16 نەمەرە، 29 شوبەرە جانە 7 شوپشەك كورىپ وتىر.

«قازاقستاندا ءبىر عاسىردان استام جاساعانداردىڭ سانى - 571»، - دەدى «ۇكىمەت - ازاماتتار ءۇشىن» مەملەكەتتىك كورپوراتسياسى الەۋمەتتىك تولەمدەردىڭ مەكەمەارالىق ەسەپ ورتالىعىنىڭ ديرەكتورى سەرىكحان سابىرجانوۆ. «جۇماش اجەيدىڭ تۋعان كۇنى - 30 - قىركۇيەك. مەرەكە قارساڭىندا تۋعان كۇنىمەن جانە مەرەيلى جاسىمەن قۇتتىقتاۋعا كەلدىك، سىيىمىزدى تابىس ەتتىك».

 سونىمەن بىرگە، استانادا مەملەكەتتىك كورپوراتسيا قىزمەتكەرلەرى قارتتار مەن مۇگەدەكتەر ۇيىنە بارىپ، مەرەكەمەن قۇتتىقتاپ قايتتى جانە سۇراقتارعا جاۋاپ بەرىپ، ۇلكەن تەلەديدار تارتۋ ەتتى. وسكەمەندە، اقتوبەدە، تاراز بەن پاۆلودارداعى «ۇكىمەت - ازاماتتار ءۇشىن» قىزمەتكەرلەرى قارتتار ۇيىندە مەرەكەلىك كونسەرتتەر ۇيىمداستىردى. الماتى، اقتاۋ، قاراعاندى جانە كوكشەتاۋدا زەينەتكەرلەرگە ازىق- تۇلىك كارزەڭكەلەرى تابىستالدى. 1 - قازان - قارتتار كۇنى «ۇكىمەت - ازاماتتار ءۇشىن» مەملەكەتتىك كورپوراتسياسىنىڭ وفيسىنە كەلگەن زەينەتكەرلەر دە سىيلىقتارعا يە بولدى.