قازاقستاندا تانىمال تۇلعالارمەن بايلانىستاعى 55 ماينينگ فەرماسىنىڭ جۇمىسى توقتاتىلدى
باسپا ءسوز قىزمەتىنىڭ مالىمەتتەرىنە قاراعاندا، وسى ۋاقىتتا الەمدە دە قازاقستاندا دا قارقىندى دامىپ كەلە جاتقان سالالاردىڭ ءبىرى - كريپتوۆاليۋتا ءوندىرۋ، كريپتوۆاليۋتا ماينينگ سالاسى. بۇل سالاداعى زاڭسىز ارەكەتتەر ەلدىڭ ەكونوميكالىق قاۋىپسىزدىگىنە قاۋىپ توندىرەتىن بەلگىلى ءبىر تاۋەكەلدەردىڭ پايدا بولۋىنا اكەلدى. وسىلايشا، قاراپايىم تۇتىنۋشىلار مەن كاسىپكەرلەرگە ەلەكتر ەنەرگياسىن جەتكىزۋدە اقاۋلار مەن تاپشىلىق قاۋپى ارتا باستادى. وسىعان بايلانىستى مەملەكەت باسشىسىنىڭ تاپسىرماسىنا سايكەس قارجىلىق مونيتورينگ اگەنتتىگى مەملەكەتتىك ورگاندارمەن بىرلەسىپ ماينينگ فەرمالارىنىڭ قىزمەتىنە كەشەندى تەكسەرۋلەر جۇرگىزدى.
«جۇرگىزىلگەن الدىن الۋ شارالارىنىڭ ناتيجەسىندە 55 ماينينگ فەرمالارى قىزمەتىن ءوز ەركىمەن توقتاتتى. ولار جۇمىستى تولىعىمەن توقتاتتى، جابدىقتارىن بولشەكتەردى جانە ونى ورنالاسقان جەرىنەن شىعاردى. مۇددەلى مەملەكەتتىك ورگاندارمەن بىرلەسىپ، مۇنداي جابدىقتاردى قايتا اينالىمعا تارتۋعا جول بەرمەۋ بويىنشا جۇمىستار جۇرگىزىلۋدە. ءوز قىزمەتتەرىن توقتاتقان ماينينگتىك كومپانيالاردىڭ قاتارىندا پاۆلودار وبلىسىندا تانىمال كاسىپكەرلەر بولات نازاربايەۆ جانە الەكساندر كلەبانوۆپەن ۇلەستەس فيرمالار بار. سونداي- اق، سولاردىڭ اراسىندا «QazaqGaz» ۇلتتىق كومپانياسى» ا ق-نىڭ اقتوبە وبلىسىنداعى بۇرىنعى باسقارما ءتوراعاسى قايرات شارىپبايەۆ جانە قاراعاندى وبلىسىنداعى تانىمال بيزنەسمەندەردىڭ ءبىرى ەرلان نىعماتۋللين بولدى»، - دەلىنگەن حابارلامادا.
سونىمەن قاتار، 51 ماينينگتىك فەرمانىڭ زاڭسىز قىزمەتىنىڭ جولى كەسىلدى. ولار قىزمەتتەرىنىڭ باستالعانى تۋرالى ۋاكىلەتتى ورگانعا حابارلاماعان نەمەسە تەحنيكالىق شارتتارسىز ەنەرگيامەن جابدىقتاۋ كوزدەرىنە زاڭسىز قوسىلدى، ارنايى ەكونوميكالىق ايماقتاردىڭ اۋماعىنا نەگىزسىز ورنالاستىرىلدى، سونداي- اق سالىقتار مەن كەدەندىك تولەمدەردى تولەۋدەن جالتاردى. بۇگىنگى كۇنى ولاردىڭ بارلىعى ەلەكترمەن جابدىقتاۋ كوزدەرىنەن اجىراتىلعان. مىسالى، قاراعاندى وبلىسىنداعى «سارىارقا» ا ە ا (ارنايى ەكونوميكالىق ايماق) اۋماعىندا ماينينگتىك فەرما زاڭسىز قىزمەت اتقاردى. بۇل ا ە ا قىزمەتىنىڭ باسىمدىلىعى جابدىقتار وندىرىسىنە، مەتاللۋرگيا ونەركاسىبى، قۇرىلىس سالالارىنا بەرىلگەن. سونداي-اق، وندىرىستىك قاجەتتىلىكتەرگە ارنالعان ەلەكتر ەنەرگياسىن جۇمساۋ، قايتا ساتۋ فاكتىلەرى انىقتالدى. پاۆلودار وبلىسىندا جىلىجاي شارۋاشىلىعىمەن اينالىساتىن ەكى كومپانيا ءۇشىنشى تۇلعالارعا ءوزىنىڭ ارتىق ەلەكتر ەنەرگياسىن ماينينگ ءۇشىن ليتسەنزياسىز ساتتى. زاڭسىز قىزمەتتى جۇزەگە اسىراتىن ماينينگتىك كومپانيالاردىڭ اراسىندا قازاقستاننىڭ ەڭ باي بيزنەسمەندەرىنىڭ ءبىرى قايرات يتەمگەنوۆپەن ۇلەستەس فيرمالار بار. بۇدان باسقا، زاڭسىز ماينينگ قىزمەتىن ىشكى ىستەر مينيسترلىگى دەپارتامەنتىنىڭ بۇرىنعى باسشىسى تىلەگەن ماتكەنوۆپەن بايلانىستى كومپانيالار جۇزەگە اسىردى.
ماينينگ جابدىقتارى قىتاي، وڭتۇستىك كورەيا، سينگاپۋر، تۇركيا جانە گرۋزيا ەلدەرىنەن اكەلىنگەن بولاتىن. ولاردى اكەلۋ كونتراباندالىق تاسىلمەن جۇزەگە اسىرىلدى. وسىنداي فاكتىلەردىڭ ءبىرى الماتى قالاسىندا انىقتالدى، قىتايدان 2,8 ميلليارد تەڭگەگە ءبىر مىڭنان استام ماينينگتىك جابدىق اكەلىندى. قارجى مونيتورينگى اگەنتتىگى بارلىعى 25 قىلمىستىق ءىستى تىركەدى، قۇنى 100 ميلليارد تەڭگەگە جۋىق 67 مىڭنان استام جابدىق تاركىلەندى. تۇتاستاي العاندا، قابىلدانىپ جاتقان شارالار ەلەكتر ەنەرگياسىن تۇتىنۋدىڭ ءوسۋىن تەجەۋگە عانا ەمەس، سونداي-اق ەنەرگيا قۋاتىنىڭ بوساتىلۋىنا دا ىقپال ەتەدى. جۇرگىزىلگەن جۇمىستىڭ ناتيجەسىندە ەلدەگى ەلەكتر ەنەرگياسىن تاۋلىكتىك تۇتىنۋى 600 مەگاۆاتت/ساعاتقا تومەندەدى.
ايتا كەتۋ كەرەك، ماينينگ جانە ساندىق اكتيۆتەردىڭ اينالىمىن جەتكىلىكتى رەتتەۋدىڭ بولماۋى قارجى جۇيەسىنە جانە ازاماتتاردىڭ ءال-اۋقاتىنا ايتارلىقتاي قاۋىپ توندىرەدى. كريپتو- اقشا تەرروريزمدى قارجىلاندىرۋ، قارۋ-جاراق پەن ەسىرتكى ساتىپ الۋ قۇرالى بولا الادى.
«وسى ءمان-جايلاردى ەسكەرە وتىرىپ، قۇرىلعان ۆەدومستۆوارالىق جۇمىس توبى (قارجىلىق مونيتورينگ اگەنتتىگىنىڭ، سيفرلىق دامۋ، ەنەرگەتيكا جانە قارجى مينيسترلىكتەرىنىڭ وكىلدەرى) شەڭبەرىندە پروبلەمالىق ماسەلەلەردى زاڭنامالىق رەتتەۋگە باعىتتالعان جۇيەلى شەشىمدەر ازىرلەنۋدە. قارجىلىق مونيتورينگ اگەنتتىگى سىزدەردى ساق بولۋعا شاقىرادى. ەگەر ءسىز زاڭسىز ماينينگتىك قىزمەتتىڭ كۋاگەرى بولساڭىز، بۇل تۋرالى جۇمىس توبىن سەنىم تەلەفونى ارقىلى حاباردار ەتۋىڭىزدى سۇرايمىز: 87172708478»، - دەلىنگەن اگەنتتىك تاراتقان اقپاراتتا.
