قازاق حاندىعىنىڭ 550 جىلدىعىنا ارنالعان كورمە - فوتو
«سۋرەتشىلەردىڭ جۇيرىك قيالىنىڭ ارقاسىندا ءبىز قازاقتىڭ اتاقتى باتىرلارى مەن بيلەرىنىڭ بەينەلەرىن كورىپ، كوزايىم بولدىق»، - دەيدى تارازدىق ەڭبەك ارداگەرى قىمبات تىلەۋبايەۆا.
مۇندا بەلگىلى جامبىلدىق سۋرەتشىلەر گۇلنار قاسپاقوۆا، مۇراتجان راقىمجانوۆ، راحات ساپاراليەۆا، كونستانتين پروۆوتوروۆ، گالينا شۋميلينا قانات مۇراتايەۆ، قايرات عۇماروۆتىڭ تۋىندىلارى ۇسىنىلدى. سونداي-اق قازاقستاننىڭ تاريحى مەن قازىرگى تاڭداعى بەينەسى بولات قۇسايىنوۆتىڭ، سەيدراحمان ازيزوۆتىڭ، نۇرلان رايىموۆتىڭ، نيكولاي دەنيسوۆتىڭ، بايماحان شەرىموۆتىڭ ەڭبەكتەرىنەن كورىنىس تاپتى.
كورمەدە سونىمەن قاتار ۇلتتىق ساندىق-قولدانبالى ونەر بۇيىمدارى ۇسىنىلدى. جانات كەرىمبايەۆ، ەسەن ەسەتوۆ، الماگۇل ساپاقوۆ، قىرعىزباي قاڭتاربايەۆ، اقەركە قوسامبەتوۆا كۇمىستى، بىلعارىنى، كيىزدى پايدالانىپ بۇيىمدار جاساۋ شەبەرلىگىن پاش ەتتى.
وبلىستىق مادەنيەت، مۇراعات جانە قۇجاتتاما باسقارماسىنىڭ باسشىسى دۇيسەنالى بىقىبايەۆتىڭ ايتۋىنشا، بۇل كورمەنىڭ باستى ماقساتى - تاربيەلىك، پاتريوتتىق ءمان بەرۋدە.
«اسىرەسە، جاستار حالقىمىزدىڭ، مەملەكەتىمىزدىڭ تاريحىن ءبىلۋى ءتيىس»، - دەدى ول.
«ماڭگىلىك ەل - مۇراتىم» تاريحي ەكسپوزيتسياسىن وبلىستىق مادەنيەت باسقارماسى مەن وبلىستىق كورمە زالى ۇيىمداستىردى.
