قازاق حاندىعىنىڭ 550 جىلدىعىنا وراي تارازدا اشىق اسپان استىندا ۇلكەن قويىلىم ساحنالانادى
ورتا عاسىرلاردا قازاق حاندىعىنىڭ نەگىزى تاراز ايماعىندا قالانعان.
سەناتور جابال ەرعاليەۆتىڭ «قيلى جول» اتتى تاريحي دراماسى بويىنشا قىزۋ دايىندالىپ جاتقان قويىلىمنىڭ جوبا جەتەكشىسى ك س ر و حالىق ءارتىسى، مەملەكەتتىك سىيلىقتاردىڭ لاۋرەاتى اسانالى ءاشىموۆ بولسا، كەڭەسشىسى - ق ر حالىق ءارتىسى ەسمۇحان وبايەۆ. سونىمەن قاتار، ق ر ەڭبەك سىڭىرگەن قايراتكەرى اۋباكىر راحيموۆ باستاعان، ق ر ەڭبەك سىڭىرگەن قايراتكەرى الما كاكىشيەۆا، ەلىك نۇرسۇلتان، مۇحتار قاپالبايەۆ سىندى رەجيسسەرلەر توبى باسشىلىق ەتەدى. جوباعا م. اۋەزوۆ تەاترىنىڭ شىعارماشىلىق توبىنان وزگە جامبىل وبلىستىق دراما تەاترىنىڭ ارتىستەرى، جۋالى اۋدانىنداعى اتتى اسكەرلەردەن جانە سولداتتاردان 500 دەن اسا ادام قاتىسادى دەپ كوزدەلىپ وتىر.
ەكى ايدان بەرى دايىندىق جۇمىستارى قىزۋ ءجۇرىپ جاتىر. كوستيۋمدەر مەن دەكوراتسيا تولىعىمەن دايىن. بارلىعى 200 اسكەري مەن 150 بيشىگە كيىم تىگىلدى.
قويىلىمنىڭ كۇردەلىلىگىن قاتىساتىن ادام سانىنان بايقاۋعا بولادى. ساحناعا ءبىر مەزەتتە 500 دەي ءارتىس شىعادى. سپەكتاكل تاراز قالاسىنىڭ ورتالىق ستاديونىندا ساحنالانادى.
«تەاترلاندىرىلعان قويىلىم بولعان سوڭ كورىنىس بارلىق الاڭعا جايىلۋى كەرەك. ارەكەت 100 مەتر راديۋستا ءوربيدى. ستاديون الاڭىنىڭ ەرەكشەلىگى سول»، - دەدى م. اۋەزوۆ تەاترىنىڭ باس سۋرەتشىسى ەسەنگەلدى تۇياقوۆ.
اۆتور: گۇلميرا عوسمانالي
