ساياسي جاعىنان دا، رۋحاني جاعىنان دا 550 جىلدىق ەڭ ورىندى مەرەكەلەردىڭ ءبىرى - د. يسابەكوۆ
بۇل تۋرالى ول بۇگىن الماتىدا «قازاق ەلى» انيماتسيالىق فيلمى جايلى وتكىزىلگەن باسپا ءسوز ءماسليحاتى بارىسىندا مالىمدەدى.
«وتكەندى تۇگەندەۋ كەرەك. تاريحىمىز جايلى بىرنەشە پىكىر بار. بالالاردىڭ ميىن قاتىرىپ جىبەردىك. وتانىڭدى ءسۇي دەگەنمەن بالالار سۇيە قويمايدى. ول ءۇشىن تاريحىمىزدى بالالارىمىزدىڭ كوز الدىنان وتكىزۋىمىز كەرەك. مىنا «ساق» كينوستۋدياسىنىڭ جارناماسىن كورىپ ءسۇيسىندىم. سەناريىن كۇنى كەشەگە دەيىن تالقىلادىق»، - دەدى جازۋشى دۋلات يسابەكوۆ.
فيلمنىڭ رەجيسسەرى باتىرحان داۋرەنبەكوۆتىڭ ايتۋىنشا، جاڭا تۋىندىنىڭ باستى ەرەكشەلىگى، ورتا عاسىرلارداعى قازاق ەلىندە دالا مادەنيەتىنەن بولەك قالا مادەنيەتىنىڭ دە گۇلدەنگەنىن كورسەتۋ.
«قازاقتىڭ تاريحىن كورسەتۋ كەزىندە كيىز ۇيمەن عانا شەكتەلىپ قالامىز. ورتا عاسىرلاردا قازاق جەرىندە وتە ءىرى قالالار بولعان. وتىرارداعى كىتاپحانانى الساق، الەمدەگى ەڭ ءىرى كىتاپحانا بولعان دەسەدى. مۋلتفيلمدە ۇلكەن سارايلاردى، ەلشىلىكتەردى قابىلداپ جاتقانىن كورسەتەمىز. بۇل دۇنيە بالالارعا ارنالىپ جاسالعان سوڭ كىشكەنتايلاردى جالىقتىرىپ الماس ءۇشىن قىزىقتى يۋمور كەلتىرىلگەن»، - دەدى فيلمنىڭ رەجيسسەرى باتىرحان داۋرەنبەكوۆ.
جاڭا مۋلتفيلم 1456-1465 -جىلدار ارالىعىنداعى قازاق حاندىعىنىڭ قالىپتاسۋ كەزەڭىن قامتيدى.
بالالاردىڭ قىزىعۋشىلىعىن ارتتىرۋ ماقساتىندا فيلمدە كەرەي مەن جانىبەكتىڭ بالا كەزدەرىندە باستارىنان وتكەن قىزىقتى وقيعالارى كورسەتىلەدى. تولىق حرونومەتراجى 1 ساعاتتان اسادى.
فيلمنىڭ پرەمەراسى تاۋەلسىزدىك كۇنىندە بارلىق كينوتەاترلاردا وتەدى.
اۆتور: گۇلميرا عوسمانالي
