ۆاشينگتوندا «قازاق حاندىعىنا 550 جىل» دەرەكتى فيلمىنىڭ تۇساۋكەسەرى ءوتتى
دجوردج ۆاشينگتون ۋنيۆەرسيتەتىندە ۇيىمداستىرىلعان تۇساۋكەسەر راسىمىندە قازاقستان رەسپۋبليكاسىنىڭ امەريكا قۇراما شتاتتارىنداعى ەلشىسى قايرات وماروۆ، دجوردج ۆاشينگتون ۋنيۆەرسيتەتى ورتالىق ازيا باعدارلاماسىنىڭ ديرەكتورى مارلەن لارۋەل جانە ق ر مادەنيەت جانە سپورت مينيسترلىگىنىڭ قازاق عىلىمي-زەرتتەۋ مادەنيەت ۋنيۆەرسيتەتىنىڭ باس ديرەكتورى اندرەي حازبۋلاتوۆ قاتىسۋشىلارعا ارنالعان قۇتتىقتاۋ ءسوز سويلەدى.
دەرەكتى فيلم نۇرسۇلتان نازاربايەۆتىڭ «تاريح اعىمىندا» كىتابىنىڭ نەگىزىندە تۇسىرىلگەن. فيلم رەجيسسەرى - باقىت قايىربەكوۆ، جوبانىڭ اتقارۋشى پروديۋسەرى - اندرەي حازبۋلاتوۆ.
«قازاق حاندىعىنا 550 جىل» فيلمى قازاق حاندىعىنىڭ قۇرىلۋ تاريحىنا ارنالعان. ول كونە جانە ورتا عاسىرلارداعى شىعىس ازيا مەن ۇلى جىبەك جولى، مونعول شاپقىنشىلىعى مەن الەمنىڭ گەوساياسي ءبولىنۋى، قازاق حالقىن جاۋلاپ الۋ تاريحناماسى، شىڭعىسحان مۇراگەرلەرىنىڭ اراسىنداعى تالاس، 1465-جىلى العاشقى دەربەس قازاق حاندىعىنىڭ قۇرىلۋى تۋرالى باياندايدى. سونىمەن قاتار كينوفيلمدە كەرەي جانە جانىبەك، ولاردىڭ ۇلدارى قاسىم جانە بۇرىندىق بيلىگى تۋرالى جاڭا دەرەكتەرى ورىن العان.
ەكى ءبولىمنىڭ كورسەتىلىمى اعىلشىن تىلىندە ءوتتى. شاراعا مەملەكەتتىك ورگانداردىڭ وكىلدەرى، تاۋەلسىز ساراپشىلار مەن قازاق دياسپوراسىنىڭ وكىلدەرى قاتىستى.
«مەن دەرەكتى فيلمنىڭ ساپاسى مەن وندا كورسەتىلگەن قازاقستان تاريحىنا ءتانتى بولدىم. بۇل كوپتەگەن تاريحي فاكتىلەردى جيناۋعا مۇمكىندىك بەرگەن «مادەني مۇرا» باعدارلاماسىنىڭ جارقىن قورىتىندىسى بولىپ تابىلادى»، - دەيدى ۆاشينگتون ۋنيۆەرسيتەتىنىڭ پروفەسسورى مارلەن لارۋەل.
