استاناداعى ورتالىق ساياباقتا قازاق حاندىعىنىڭ 550 جىلدىعىنا ارنالعان تەاترلاندىرىلعان كورىنىس قويىلدى - كەسكىن
اتالمىش ءىس-شارا قازاق مەملەكەتىنىڭ قۇرىلۋ جانە دامۋ تاريحىن دارىپتەۋ، قازاقستان تاريحىنا بەلگىلى تۇلعالاردىڭ قوسقان ۇلەسىن كورسەتۋ جانە جاستارعا پاتريوتتىق تاربيە بەرۋگە باعىتتالعان.
قويىلىمنىڭ رەجيسسەرى ق. قۋانىشبايەۆ تەاترىنىڭ ديرەكتورى، باس رەجيسسەرى بولات ۇزاقوۆ، سەناري اۆتورى بەلگىلى جازۋشى، دراماتۋرگ دۋمان رامازان.
«ءبىر ساعاتقا سوزىلاتىن كورىنىستە ءبىز قازاق حاندىعىنىڭ نەگىزىن قالاعان كەرەي مەن جانىبەك حانداردان باستاپ، سوڭعى حان كەنەسارىعا دەيىنگى ارالىقتى قامتۋعا تىرىستىق. وسى ەكى ارالىقتاعى ءىرى ىستەرىمەن ەرەكشە اتالاتىن ءاز تاۋكە، ابىلاي سىندى حانداردى دا قويىلىمعا ەنگىزدىك. قويىلىمداردىڭ اراسىندا ءار ءداۋىردىڭ اسان قايعى، قازتۋعان، بۇحار سىندى جىراۋلارىن دا ەنگىزدىك. جالپى دايىندىق جۇمىستارى ءتورت اي بويى جۇرگىزىلدى»، - دەپ اتاپ ءوتتى ب. ۇزاقوۆ.
قويىلىم بارىسىندا كورەرمەندەر بەس قارۋىن اسىنعان قازاق باتىرلارىنىڭ جەكپە-جەگىن تاماشالاپ، استىنداعى تۇلپارىن تىك شاپشىتقان شاباندوزداردىڭ ونەرىن كوردى.
