قازاق حاندىعىنا 550 جىل: تارازداعى نەگىزگى مەرەيتويلىق شارالار قازان ايىنا بەلگىلەندى
قۇرىلىس جۇمىستارىمەن قاتار، كەڭ اۋقىمدى مادەني-بۇقارالىق شارالار باعدارلاماسى قالىپتاستىرىلۋدا.
جامبىل وبلىسى اكىمىنىڭ ىشكى ساياسات باسقارماسىنان حابارلاعانىنداي، قازاقستاننىڭ بارلىق وڭىرلەرى مەن باسقا دا ەلدەردەن قوناقتاردىڭ كەلۋى كۇتىلىپ وتىرعان شارالاردى وتكىزۋ 7-10- قازان كۇندەرىنە بەلگىلەنىپ وتىر.
نەگىزگى سالتاناتتى شارالاردىڭ ءبىرى - تارازدىڭ كىرە-بەرىسىندە «قازاق حاندىعىنا 550 جىل» مونۋمەنتىنىڭ اشىلۋى بولماق.
«تاراز-ارەنا» سپورت سارايىندا ق ر پرەزيدەنتىنىڭ جۇلدەسى ءۇشىن قازاق كۇرەسىنەن «ەۋرازيا بارىسى» حالىقارالىق تۋرنيرى وتەدى.
«ماڭگىلىك ەل» رەسپۋبليكالىق اقىندار ايتىسى ەلىمىزدىڭ تاڭداۋلى سۋىرىپ سالما اقىندارىنىڭ باسىن قوسادى.
تارازداعى تۇڭعىش پرەزيدەنت ساياباعىندا «قازاق الەمى» تاريحي- ەتنوگرافيالىق شارالارى اشىلادى. مۇندا قازاقستان بيلەۋشىلەرى وردالارىنىڭ تاريحي كومپوزيتسياسى تىگىلەدى، سونداي-اق بالالاردىڭ ەتنوگرافيالىق الاڭقايى اشىلادى. تەاترلاندىرىلعان قويىلىمدار جانە ساندىك-قولدانبالى ونەر بۇيىمدارىنىڭ كورمەسى وتەدى. قوناقتارعا سيرك قويىلىمدارى، سونداي-اق قىتايلىق شياڭ قالاسىنان ۇلى جىبەك جولىمەن كەلە جاتقان كەرۋەن ەكسپەديتسياسىنىڭ قاتىسۋشىلارىن قارسى الۋ ۇسىنىلادى.
تەاتر ونەرىنە تابىنۋشىلار الماتىلىق م. اۋەزوۆ اتىنداعى قازاق مەملەكەتتىك اكادەميالىق قازاق دراما تەاترى مەن جەرگىلىكتى تەاتر ترۋپپاسىنىڭ تاريحي سپەكتاكلدەرىن تاماشالايدى.
قالالىق «اتشاباردا» «حورسپولو» جاڭا ويىنى تانىستىرىلادى. وسىندا ۇلتتىق ات سپورتى جارىستارى وتەدى.
تارازداعى مەرەيلىك سالتاناتتار كۇندەرىندە ەجەلگى قالانىڭ ارحەولوگيالىق قازبالارى ءجۇرىپ جاتقان بۇرىنعى ورتالىق بازار ورنىندا اشىق اسپان استىنداعى «ەجەلگى تاراز» ارحەولوگيالىق پاركى مۇراجايى اشىلادى. ەجەلگى تارازدىڭ بەينەسىن قالپىنا كەلتىرۋ جۇمىستارى قازىر قىزۋ ءجۇرىپ جاتىر.
ەسكە سالا كەتەيىك، قازاق حاندىعىنىڭ 550 جىلدىعىن مەرەكەلەۋ بيىلعى جىلى ەلدىڭ بارلىق وڭىرلەرىنە وتۋدە. نەگىزگى سالتاناتتار جامبىل وبلىسىندا، بۇدان 550 جىل بۇرىن جايساڭ شاتقالىندا، تالاس پەن شۋ وزەندەرىنىڭ اراسىندا كەرەي مەن جانىبەك سۇلتاندار قازاق حاندىعىنىڭ نەگىزىن قالاعان جەردە وتەدى.
