ب. اياعان: قازاق حاندىعىنىڭ 550 جىلدىعىن اتاپ ءوتۋ - جىلدىڭ ماڭىزدى وقيعالارىنىڭ ءبىرى
بۇل پىكىردى بۇگىن ق ر پرەزيدەنتى جانىنداعى و ك ق- دە وتكەن بريفينگتە ق ر ب ع م عىلىم كوميتەتى مەملەكەت تاريحى ينستيتۋتىنىڭ ديرەكتورى بۇركىتباي اياعان ءبىلدىردى.
«قازاق حاندىعىنان تاۋەلسىز قازاقستانعا دەيىن» دەپ اتالاتىن وتە ماڭىزدى كونفەرەنتسيا ەكىنشى كۇن قاتارىنان وتكىزىلۋدە. بۇل شارا ق ر تۇڭعىش پرەزيدەنتى قورىنىڭ تىكەلەي قولداۋمەن اتقارىلۋدا. قازاق حاندىعىنىڭ 550 جىلدىعىن اتاپ ءوتۋ - اعىمداعى جىلعى ماڭىزدى وقيعالاردىڭ ءبىرى. كەشە باستالعان كونفەرەنتسياعا قازاق حاندىعىنىڭ تاريحىن، قازاق مەملەكەتىنىڭ قالىپتاسۋىن تىڭعىلىقتى زەرتتەپ جۇرگەن شەتەلدىك وتە بەدەلدى عالىمدار شاقىرىلعان»، - دەدى ول.
ونىڭ اتاپ وتۋىنشە، كونفەرەنتسيا بارىسىندا قازاقتىڭ بۇعان دەيىن بەيمالىم بولىپ كەلگەن تاريحىنان سىر شەرتەتىن قۇندى دەرەكتەرگە بايلانىستى جەمىستى پىكىر-سايىس جۇرگىزىلگەن.
«بۇگىن ءبىز بۇل كونفەرەنتسيانى جالعاستىرامىز. ءبىز كەرەي مەن جانىبەك حانداردىڭ ەسكەرتكىشىنە بارىپ، ق ر مەملەكەتتىك مۇراجايىندا بولامىز. عىلىمي بايلانىستارىمىز ودان ءارى جالعاسىن تابادى»، - دەدى ب. اياعان.
ق ر تۇڭعىش پرەزيدەنتى قورى باعدارلامالار، جوبالار جانە كوممۋنيكاتسيالار قىزمەتىنىڭ جەتەكشىسى پاۆەل كازانتسيەۆتىڭ ايتۋىنشا، كونفەرەنتسياعا رەسەي، ۋكراينا، تۇركيا، يتاليادان تانىمال عالىمدار كەلگەن.
«ولار تەك قازاق مەملەكەتتىگىنىڭ دامۋى تاريحىنا عانا ەمەس، سونىمەن بىرگە قازاق حاندىعىنىڭ قالىپتاسۋىنا دا زور قىزىعۋشىلىق تانىتىپ جۇرگەن ءوز ىستەرىنىڭ ماماندارى. تەك ەلىمىزدە عانا ەمەس، الەمدىك دەڭگەيدە ءبىزدىڭ مەملەكەتتىگىمىزدىڭ قالىپتاسۋ تاريحىنا زەيىن قويعان عالىمداردىڭ بولۋى قۋانتادى. ءبىز ق ر تۇڭعىش پرەزيدەنتى قورى رەتىندە ەلىمىزدە ءدال وسىنداي تاريحي جوبالاردى الداعى ۋاقىتتا دا جالعاستىرماقپىز»، - دەدى پ. كازانتسيەۆ.
اۆتور: مارلان جيەمباي
