قازاق حاندىعىنىڭ 550 جىلدىعىن تويلاۋ قازاق تەاترىنان باستالدى
وسى ورايدا ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى اتالعان شارالارعا قانداي ۇلەس قوسادى جانە ۇجىمنىڭ بولاشاقتاعى جوسپارلارى قانداي دەگەن سۇراقتارعا ونەر ورداسىنىڭ ديرەكتورى، قازاقستاننىڭ ەڭبەك سىڭىرگەن قايراتكەرى بولات ۇزاقوۆ جاۋاپ بەرگەن ەدى
- اڭگىمەمىزدى ءوزىڭىز باسقارىپ وتىرعان تەاتردىڭ بيىلعى رەپەرتۋارى تۋرالى سوزدەرمەن باستاساق. قورجىندارىڭىزدا قانداي پرەمەرالار بار؟
- بيىلعى جىل مەملەكەت تاراپىنان بەكىتىلگەن ءتورت بىردەي - قازاق حاندىعىنىڭ 550 جىلدىعى، ۇلى جەڭىستىڭ 70 جىلدىعى، قازاقستان حالقى اسسامبلەياسىنا - 20 جىل، ق ر كونستيتۋتسياسىنا 20 جىل سياقتى مەرەيتويلارعا ارنالىپ وتىرعاندىقتان، تاقىرىپقا ساي جاڭا قويىلىمداردى كورەرمەندەر نازارىنا ۇسىنۋدى ءجون ساناپ وتىرمىز. الداعى ناۋرىز ايىنىڭ 4, 5, 6 جۇلدىزىندا ۆ. ەجوۆتىڭ «بۇلبۇلدار ءتۇنى» شىعارماسى بويىنشا «تىراۋلاپ ۇشقان تىرنالار» ، 22- ناۋرىز - ۇلىستىڭ ۇلى كۇنىنە ارناپ 17, 18, 19 ناۋرىزدا م. احمانوۆتىڭ «الداردىڭ ايلاسى» اتتى ەرتەگىنىڭ پرەمەراسىن ۇسىنامىز. بولاشاقتا بۇلاردان باسقا دا جاڭا تۋىندىلاردى ساحنالايمىز دەپ جوسپارلاپ وتىرمىز.
- ال قازاق حاندىعىنىڭ 550 جىلدىعىنا ارنالعان قانداي قويىلىمدار كورە الامىز؟
- قازاق حاندىعىنىڭ 550 جىلدىعىن تويلاۋ قازاق تەاترىنان باستالدى دەسەك تە بولادى. اقپان ايىنىڭ 7- جۇلدىزىندا دۋمان رامازاننىڭ «ابىلاي حاننىڭ ارمانى» اتتى تاريحي دراماسىن مەملەكەتتىك حاتشى گۇلشارا ءابدىقالىقوۆا، مادەنيەت جانە سپورت ءمينيسترى ارىستانبەك مۇحامەدي ۇلى باستاعان ءبىر توپ لاۋازىم يەلەرى تاماشالادى. بۇل قويىلىم 2013-جىلى ساحنالانعان ەدى، قازاق حاندىعىنىڭ 550 جىلدىعىن تويلاۋ اياسىندا ازداعان وڭدەۋدەن ءوتىپ، كورەرمەنگە قايتا ۇسىنىلدى. سول سياقتى 2010-جىلدان باستاپ تەاتر رەپەرتۋارىندا دراماتۋرگ د. رامازاننىڭ «كەنەسارى - كۇنىمجان» تاريحي دراماسى ۇسىنىلىپ كەلەدى. ەكى شىعارمانى دا رەجيسسەر رەتىندە مەن ساحنالاپ شىقتىم.
- ۇلى وتان سوعىسىنداعى جەڭىستىڭ 70 جىلدىعىنا ارنالعان قانداي سپەكتاكلدەر بار؟
- ۇلى وتان سوعىسىنداعى جەڭىستىڭ 70 جىلدىعىنا ارناپ، جوعارىدا ايتىپ وتكەندەي، ۆ. ەجوۆتىڭ «بۇلبۇلدار ءتۇنى» شىعارماسى جەلىسىمەن «تىراۋلاپ ۇشقان تىرنالار» اتتى ليريكالىق درامانى قويماقپىز. ونى رەجيسسەر، قازاقستاننىڭ حالىق ءارتىسى، تەاترىمىزدىڭ كوركەمدىك جەتەكشىسى تالعات تەمەنوۆتىڭ ساحنالاۋىندا 4, 5, 6- ناۋرىزدا كورەرمەندەر نازارىنا ۇسىنامىز.
سول سەكىلدى ۇلى وتان سوعىسىنداعى جەڭىستىڭ قۇرمەتىنە بيىلعى ماۋسىمدا 2000-جىلدارى ساحنالانعان ش. ايتماتوۆتىڭ «انا -جەر انا» تراگەدياسى قايتا ساحنالانىپ، رەپەرتۋارىمىزدا ءجۇرىپ جاتىر. قويىلىمنىڭ رەجيسسەرى - حالىق قاھارمانى ءا. مامبەتوۆ.
- اكتەرلىك ونەر اركىمنىڭ ماڭدايىنا جازىلا بەرمەيتىن باق قوي. وعان تالاي سىننىڭ تەزىنەن ءوتىپ، تالاي قيىندىقتى جەڭگەن مىقتى ماماندار عانا توزە الادى. سونىمەن قاتار، ساحنادا كورىنبەيتىن، الايدا قويىلىمدى دايىنداۋدا قىرۋار شارۋا اتقارىپ جۇرگەن ازاماتتار دا بار. وسى رەتتە بىلگىمىز كەلەتىنى، قازىرگى تەاتردىڭ ۇجىمى قانداي؟ قانداي ادامدار قىزمەت ەتەدى؟
- تەاترىمىزدا اعا-ورتا-جاس بۋىننان تۇراتىن الپىسقا جۋىق ارتىستەر قۇرامى مەن بىرگە تەحنيكالىق، اكىمشىلىك قىزمەتكەرلەرى ەڭبەك ەتەدى. حورمەيستەر، بالەتمەيستەر، باس سۋرەتشى، باس ادمينيستراتور ماماندارى دا بار. ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ەلوردامىز استاناداعى تولىق قۇرامداعى كاسىبي ماماندار شوعىرلانعان، جوعارى ساناتتاعى ونەر ۇجىمىنىڭ ءبىرى بولىپ تابىلادى.
- جاس ارتىستەر قانشا؟ ولار قاي جاقتاردان كەلەدى؟ تەاترعا قالاي قابىلدايسىزدار؟
- جاس ارتىستەردىڭ سانى - 20 ادام. ولاردىڭ بارلىعى استانا قالاسىنداعى قازاق ۇلتتىق ونەر ۋنيۆەرسيتەتىنىڭ «تەاتر ءبولىمى» مەن الماتىداعى ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ «اكتەرلىك ءبولىمىن» ءتامامداپ كەلىپ، بىزدە ارنايى كاستينگتەن ءوتىپ، قابىلدانعان ونەرپاز جاستار.
- قانداي رەجيسسەرلەرمەن تىعىز بايلانىستا جۇمىس جاسايسىزدار؟
- ءبىز رەسپۋبليكا بويىنشا ءۇش بىردەي رەجيسسەرى بار تەاتر ۇجىمىنىڭ ءبىرى بولىپ تابىلامىز. سوندىقتان دا سىرتتان ارنايى رەجيسسەرلەر شاقىرىپ، سپەكتاكلدەر قويىپ جاتقان جوقپىز. بولاشاقتا ارتىستەردىڭ تاجىريبەسىن جەتىلدىرۋ ماقساتىندا شەتەلدەردەن ارنايى رەجيسسەرلەر شاقىرىپ، سپەكتاكلدەر مەن شەبەرلىك ساباقتارىن وتكىزۋ جوسپارىمىزدا بار.
- كورەرمەن ماسەلەسى قالاي؟ جىل سايىن قانشا ادام تەاترعا سپەكتاكل كورۋگە كەلەدى؟ ستاتيستيكالىق دەرەكتەر بار ما؟
- بىزدە جىل سايىن تەاترعا كەلەتىن كورەرمەندەردىڭ سانى ارتىپ كەلەدى. كورەرمەندەرمەن جۇمىس ءبولىمى اي سايىن، اپتا سايىن مونيتورينگ جۇرگىزىپ وتىرادى. سوڭعى مالىمەتكە سۇيەنىپ ايتار بولسام، قاڭتار ايىندا وزدەرى بيلەت الىپ كەلگەن كورەرمەن سانى - 1771 ادام بولسا، راديو، تەلەارنالاردا اي سايىن سپەكتاكلدەرگە تەگىن ويناتىلاتىن شاقىرۋ بيلەتتەرى بويىنشا 156 كورەرمەن كەلدى. سول سياقتى ارنايى قويىلىمعا تەگىن كىرەتىن ارداگەرلەر ءۇيى مەن جەتىمدەر ۇيىنەن كەلەتىن كورەرمەندەرىمىز دە بار.
- بولاشاقتا تەاتردى دامىتۋ ءۇشىن قانداي جۇمىستار اتقارىلۋ قاجەت؟
- تەاتردى دامىتۋ ءۇشىن بولاشاقتا حالىقارالىق تەاتر فەستيۆالى مەن شەتەلگە قازاق ونەرىن تانىستىرۋ، دارىپتەۋ ماقساتىندا گاسترولدىك ساپارلار ۇيىمداستىرۋدى جوسپارلاپ وتىرمىز. وسى ماقساتتا تەاترىمىزدا «حالىقارالىق قاتىناستار» ءبولىمىن اشتىق، وندا كاسىبي ماماندار قىزمەت اتقارۋدا. بولاشاقتا ويعا العان جوسپارلارىمىز ورىندالادى دەپ ۇمىتتەنەمىز.
- اڭگىمەڭىزگە راحمەت!
اۆتور: ءابۋ-اسقار مەكەش ۇلى
