قازاق حاندىعىنىڭ 550 -جىلدىعىن اتاپ ءوتۋ اياسىندا كولىك كەرۋەنى جولعا شىقپاق

استانا. قازاقپارات - بيىل اقمولا وبلىسىندا قازاق حاندىعىنىڭ 550 جىلدىعىن اتاپ ءوتۋ اياسىندا «قازاق ەلى - ماڭگىلىك ەل» اتتى اۆتوكەرۋەن ايماقتىڭ اۋدان مەن اۋىلدارىن ارالايدى. ۇيىمداستىرۋشىلار اقمولالىقتاردى تامىرى تەرەڭ قازاق تاريحىمەن تانىستىرىپ، مەرەكەلىك كونسەرت قويادى.

كولىك كەرۋەنى الداعى ناۋرىز ايىندا جولعا شىقپاق. بۇل تۋرالى كوكشەتاۋدا وتكەن «قازاق دالاسىنىڭ ۇلى تاريحى» اتتى دوڭگەلەك ۇستەل كەزىندە بەلگىلى بولدى. ودان بولەك، وسى جىلى تاريح تاقىرىبىندا رەسپۋبليكالىق اقىندار ايتىسى مەن حالىقارالىق عىلىمي-تاجىريبەلىك كونفەرەنتسيا وتكىزىلمەك.

جيىنعا قاتىسۋشىلار بەلگىلى ءبىر ءىس- شارالارمەن عانا شەكتەلىپ قالماي، اتا تەگىمىزدى تەرەڭ زەرتتەپ، ونى جاستارعا جاقسىلاپ جەتكىزە ءبىلۋىمىز كەرەك دەپ وتىر.

ءسابيت جامبەك، ادەبيەتتانۋشى: - ءالى دە زەرتتەيتىن تۇستار كوپ. ابىلاي حاننىڭ ءوزىن تولىق زەرتتەپ بولدىق دەپ ايتا المايمىز. كەنەسارى قوزعالىسى ءبىرشاما زەرتتەلگەن. ءبىزدىڭ عالىمدارىمىز بەن تاريحشىلارىمىزعا ءبىراز ىزدەنۋ كەرەك سياقتى.

www.24.kz