قازاق حاندىعىنىڭ 550 جىلدىعىنا وراي قىتايدان كەرۋەن كەلە جاتىر

استانا. قازاقپارات - قازاق حاندىعىنىڭ 550 جىلدىعىنا وراي 2014-جىلدىڭ قىركۇيەگىندە قىتاي حالىق رەسپۋبليكاسىنان 130 دان استام تۇيە، 10 ات اربا، 100 دەن استام ادامى بار كەرۋەن جامبىل وبلىسىنا قاراي بەت العان.

كەرۋەن وسى جىلدىڭ 18- قىركۇيەگىندە تارازعا جەتەدى دەپ جوسپارلانۋدا. بۇل تۋرالى بۇگىن «نۇر وتان» پارتياسى جانىنداعى مادەنيەت پەن ونەردى دامىتۋ ماسەلەلەرى جونىندەگى «ميراس» قوعامدىق كەڭەسىنىڭ وتىرىسىندا جامبىل وبلىسى اكىمىنىڭ ورىنباسارى ەرقانات مانجۋوۆ ءمالىم ەتتى، دەپ حابارلايدى BNews.kz ءتىلشىسى.

«جالپى، قازاق حاندىعىنىڭ 550 جىلدىعىن جامبىل وبلىسىندا اتاپ ءوتۋ تۋرالى تاپسىرمالارعا سايكەس، 17-18- قىركۇيەك كۇندەرى باستى ءىس-شارالاردى وتكىزۋ جوسپارلانۋدا. 17- قىركۇيەك كۇنى مەرەيتويلىق ءىس-شارالار «قازاق حاندىعىنىڭ قۇرىلۋى جانە تاريحى» اتتى ارنايى شىعارماشالىق كىتاپتارىنىڭ تۇساۋكەسەرىمەن باستالادى. ماڭگىلىك ەل يدەياسىنىڭ اياسىندا «نۇر وتان» پارتياسىنىڭ قولداۋىمەن قازاق حاندىعىنىڭ 550 جىلدىعىنا ارنالعان رەسپۋبليكالىق اقىندار ايتىسى، وبلىستاردىڭ مەرەكەلىك كونسەرتتىك باعدارلامالارى دا وسى كۇنى وتەدى. سونىمەن قاتار، جازۋشى قاليحان ىسقاقتىڭ «قازاقتار» اتتى تاريحي درامالىق قويىلىمى وتەدى»، - دەگەن اكىم ورىنباسارى 18- قىركۇيەكتىڭ ءىس-شارالارى كونە ارحەولوگيالىق ساياباقتىڭ اشىلۋىمەن باستالاتىنىن جەتكىزدى.

«18- قىركۇيەك كۇنى كونە تاراز ارحەولوگيالىق پاركى مەن ەجەلگى تاراز مۋزەيى، قازاق حاندىعى مەموريالدى مونۋمەنتىنىڭ سالتاناتتى اشىلۋ راسىمدەرى وتەدى. ەتنوقالاشىقتا تەاترلاندىرىلعان شەرۋ ۇيىمداستىرىلادى. تەاترلاندىرىلعان شەرۋگە قىتاي حالىق رەسپۋبليكاسىنان 2014-جىلدىڭ قىركۇيەگىندە شىققان ۇلى جىبەك جولىنداعى مادەنيەت كەرۋەنى كەلەدى. وسىلايشا 136 تۇيە، 10 ات اربا، 25 اۆتوكولىك جانە جۇزدەن اسا كەرۋەنشىنى توسىپ الامىز»، - دەدى اكىم ورىنباسارى.

Baq.kz