قازاق حاندىعىنىڭ 550 جىلدىعى قۇرمەتىندەگى مەرەيتويلىق سالتاناتتارعا تارازدى بۇكىل حالىق بولىپ اباتتاندىرادى

تاراز. قازاقپارات - قازاق حاندىعىنىڭ 550 جىلدىق مەرەيتويى اياسىنداعى مەرەكەلىك شارالارعا ازىرلىك جونىندەگى ارنايى كوميسسيا قۇرىلدى.

«وبلىسىمىزدا، ءبىزدىڭ قالامىزدا قازاق حاندىعىنىڭ 550 جىلدىعىنا وراي كوپتەگەن شارالاردىڭ وتكىزىلۋى - بۇل زور قۇرمەت قانا ەمەس، سونىمەن بىرگە ۇلكەن جاۋاپكەرشىلىك. نەگىزگى شارالار قىركۇيەك ايىندا وتەدى. ەجەلگى تارازعا كوپتەگەن قوناقتار كەلەدى، سوندىقتان دا ءبىز قالانى مەرەكەگە ازىرلەۋىمىز، قوناقتاردى لايىقتى قارسى الۋىمىز قاجەت»، - دەپ اڭگىمەلەدى قازاقپارات تىلشىسىنە جامبىل وبلىسىنىڭ اكىمى كارىم كوكىرەكبايەۆ.

ءوڭىر باسشىسى بولىنگەن قاراجاتتار مەرەكەگە عانا ەمەس، قالانىڭ ينفراقۇرىلىمىن جاقسارتۋعا، سونىڭ ىشىندە كىرمەجولدار تارتۋعا، كوشەلەردى، وتپەجولداردى كۇردەلى جوندەۋگە جۇمسالاتىنىن ايتتى.

ك. كوكىرەكبايەۆتىڭ ايتۋىنشا، وبلىس ورتالىعىنىڭ ينفراقۇرىلىمىن مەرەكەلىك سالتاناتتارعا دەيىن اباتتاندىرۋعا قازاقستاننىڭ بارلىق وڭىرلەرى كومەكتەسەدى. ءار وبلىس نەمەسە قالا ءۇشىن ولار اباتتاندىراتىن بەلگىلى ءبىر ۋچاسكەلەر ءبولىندى. «مىسالعا، پاۆلودار وبلىسى قالانىڭ باتىس كىرمەجولىنداعى كوپىر ايرىعىن اباتتاندىرۋمەن اينالىسادى»، دەپ ناقتىلادى ول.

قازاق حاندىعىنىڭ 550 جىلدىعىنا بايلانىستى شارالارعا 22,7 ميلليارد تەڭگەدەن استام قارجى ءبولۋ جوسپارلانعان، ونىڭ 13,4 ميللياردى - تارازداعى بۇقارالىق شارالارعا جۇمسالماق.

ەسكە سالا كەتەيىك، بۇدان 550 جىل بۇرىن جامبىل وبلىسىنىڭ اۋماعىندا، تالاس جانە شۋ وزەندەرىنىڭ اراسىندا كەرەي مەن جانىبەك سۇلتاندار قازاق حاندىعىنىڭ نەگىزىن قالادى.