19:45, 12 - قاڭتار 2015 | GMT +6
تاراز قالاسىندا قازاق حاندىعىنىڭ 550 جىلدىعىنا ارنالعان مونۋمەنت ورناتىلادى
استانا. قازاقپارات - قازاقستان رەسپۋبليكاسىنىڭ مادەنيەت جانە سپورت مينيسترلىگى مەن جامبىل وبىسىنىڭ اكىمدىگى قازاق حاندىعىنىڭ 550 جىلدىعىنا وراي تاراز قالاسىندا ورناتىلاتىن مونۋمەنتتىڭ تاڭداۋلى جوباسىنا رەسپۋبليكالىق اشىق كونكۋرس جاريالايدى، دەپ حابارلايدى اتالعان ۆەدومستۆونىڭ رەسمي سايتى.
كونكۋرستىڭ ماقساتى - قازاق حاندىعىنىڭ قۇرىلۋىنىڭ تاريحي ماڭىزدىلىعىن ايشىقتايتىن مونۋمەنتالدى ەسكەرتكىشتىڭ مۇسىندىك- كوركەمدىك شەشىمىن تابۋ.
«كونكۋرسقا ۇسىنىلعان جوبالار انسامبلدىك ۇيلەسىمدى شەشىممەن قورىتىندىلانعان جوعارى يدەيالىق جانە ساۋلەتتىك-كوركەمدىك دەڭگەيدە ورىندالۋى ءتيىس»، دەلىنگەن حابارلامادا.
بارلىق گرافيكالىق جۇمىستار 60 x 80 سانتيمەترلىك پلانشەتتە بەرىلەدى. گرافيكالىق ورىنداۋ ادىستەرى - ماكەتتىڭ ءتۇسى، تەحنيكاسى، ماتەريالى جانە ءمۇسىن اۆتوردىڭ قالاۋى بويىنشا ورىندالادى.
كونكۋرسقا قاتىسۋعا اۆتورلار جانە اۆتورلىق كوللەكتيۆتەر شاقىرىلادى.
