قازاق حاندىعىنىڭ 550 جىلدىعى شەت ەلدەردە اتاپ وتىلەدى - سىرتقى ىستەر ءمينيسترى ەرلان ىدىرىسوۆ
«سونىمەن قاتار ءبىز قازاق حاندىعىنىڭ 550 جىلدىعى، قازاقستان رەسپۋبليكاسى اتا زاڭىنىڭ 20 جىلدىعى جانە قازاقستان حالقى اسسامبلەياسىنىڭ جىلى ءتارىزدى ەلىمىزدىڭ ىشكى ومىرىندە بولىپ جاتقان ماڭىزدى وقيعالاردى اتاپ وتۋگە، سونىڭ ىشىندە شەت ەلدەردە اتاپ وتۋگە دايىندالۋدامىز»، - دەدى ول.
ول سونداي- اق بولاشاقتا جاسالاتىن ناقتى جۇمىستارعا دا توقتالىپ ءوتتى.
ونىڭ ايتۋىنشا، جاڭا جىلدا سىرتقى ىستەر مينيسترلىگى «قازاقستان-2050» ستراتەگياسى مەن «نۇرلى جول» جاڭا ەكونوميكالىق ساياساتىن جۇزەگە اسىرۋعا بارىنشا قولايلى سىرتقى جاعدايلاردى قامتاماسىز ەتۋ ءۇشىن ءدال وسىلاي بەلسەندى تۇردە قىزمەتىن جالعاستىراتىن بولادى، ياعني وتاندىق ەكونوميكانى نىعايتۋ، وتانداستارىمىزدىڭ ءال- اۋقاتىن ارتتىرۋ مەن قازاقستاندى الەمنىڭ ەڭ دامىعان 30 ەل قاتارىنا كىرگىزۋ ماقساتىنا جاقىنداتۋ باعىتىندا جۇمىستار اتقارىلادى.
«ارينە، ءبىز ەلباسىنىڭ سىرتقى ساياسي باعىتىن ىسكە اسىرا وتىرىپ، اۋعانستاننان حالىقارالىق كونتينگەنتتىڭ نەگىزگى بولىگىنىڭ شىعارىلۋى، يادرولىق قارۋسىزدانۋ مەن ونى تاراتپاۋ سالاسىنداعى ماسەلەلەردىڭ كوكەيكەستىلىگىن ەسكەرە وتىرىپ، ءارى قاراي وڭىرلىك جانە عالامدىق قاۋىپسىزدىكتى نىعايتۋ ءۇشىن كۇش- جىگەرىمىزدى جۇمساي تۇسەتىن بولامىز»، دەپ اتاپ ءوتتى مينيستر.
سونداي- اق ول استانادا يسلام ىنتىماقتاستىق ۇيىمىنىڭ ازىق- تۇلىك قاۋىپسىزدىگى جونىندە يسلام ۇيىمىن قۇرۋ بويىنشا، دامۋعا رەسمي كومەك كورسەتۋ جۇيەسىن قۇرۋ، سونىڭ ىشىندە KazAID اگەنتتىگىن قۇرۋ، «ەكسپو-2017» حالىقارالىق مامانداندىرىلعان كورمەسىنە دايىندىق، قازاقستاننىڭ كانديداتۋراسىن ب ۇ ۇ قاۋىپسىزدىك كەڭەسىنە تۇراقتى ەمەس مۇشەلىككە ىلگەرىلەتۋ بويىنشا جۇمىستاردىڭ جالعاساتىنىن ايتتى.
«ءبىز تۇراقتى ارىپتەستەرىمىزبەن دە، جاڭا ارىپتەستەرىمىزبەن دە، اسىرەسە، افريكا مەن وڭتۇستىك امەريكا سەكىلدى ءبىز ءۇشىن ايتارلىقتاي جاڭا ايماقتارداعى دوستارىمىزبەن ءوزارا ءتيىمدى قارىم- قاتىناستارىمىزدى نىعايتا تۇسۋگە كۇش سالاتىن بولامىز»، - دەلىنگەن ءمينيستردىڭ قۇتتىقتاۋىندا.
اۆتور: جاسۇلان جولدىبايەۆ
