قازاق حاندىعىنىڭ 550 جىلدىعىن بۇكىل ەل بولىپ اتاپ ءوتۋىمىز قاجەت - ب. ساپاربايەۆ

استانا. قازاقپارات - قازاق حاندىعىنىڭ 550 جىلدىعىن بۇكىل ەل بولىپ اتاپ ءوتۋىمىز قاجەت.

 بۇل تۋرالى بۇگىن قازاق حاندىعىنىڭ 550 جىلدىق مەرەيتويىن وتكىزۋ جونىندەگى رەسپۋبليكالىق كوميسسيانىڭ ءبىرىنشى وتىرىسىندا ق ر پرەمەر- ءمينيسترىنىڭ ورىنباسارى بەردىبەك ساپاربايەۆ ايتتى.

 ب. ساپاربايەۆ ءوز سوزىندە ەلباسى ن. نازاربايەۆ كەلەسى جىلى قازاق حاندىعىنىڭ 550 جىلدىعى اتاپ وتكىلەتىندىگىن ايتقاندىعىن ەسكە سالعان ول: «جاقىندا عانا ۇكىمەت قاۋلىسى قابىلداندى. وعان سايكەس وسى ءىس- شارانى وتكىزۋ ءۇشىن رەسپۋبليكالىق كوميسسيا قۇرىلدى. ونىڭ ءتوراعاسى پرەمەر- ءمينيستردىڭ ورىنباسارى، قۇرامىنا پرەزيدەنت اكىمشىلىگى باسشىسىنىڭ ورىنباسارى، مينيستر، جامبىل وبلىسىنىڭ اكىمى، مينيسترلەردىڭ، وبلىس اكىمدەرىنىڭ ورىنباسارلارى ەندى»، - دەدى.

 ونىڭ ايتۋىنشا، بۇگىن كوميسسيانىڭ ءبىرىنشى وتىرىسىن وتكىزۋدەگى ماقسات - كەلەشەكتە قانداي ءىس- شارالار وتكىزۋ كەرەكتىگىن پىسىقتاۋ.

 «بۇل مەرەكەنى بۇكىل قازاقستاندىقتار بولىپ اتاپ ءوتۋىمىز كەرەك. مەملەكەتتىڭ قالىپتاسۋى سول كەزدەن باستالاتىندىعىن نىقتاپ، ونىڭ قازاققا عانا ەمەس، قازاقستاندا تۇرىپ جاتقان بارلىق ۇلتتار مەن ۇلىستاردىڭ وكىلدەرىنە قاتىستى ەكەنىن پاش ەتۋگە ءتيىسپىز»، - دەدى ول.

 ۇكىمەت باسشىسى ورىنباسارىنىڭ سوزىنە قاراعاندا، قازاق حاندىعىنىڭ 550 جىلدىق مەرەيتويىنا قاتىستى ءىس- شارالار تەك قانا جامبىل وڭىرمەن شەكتەلمەۋى ءتيىس. سەبەبى قازاق حاندىعىنىڭ ارى قاراي دامۋىنا، قالىپتاسۋىنا باسقا دا قالالاردىڭ ۇلەسى بار. ماسەلەن، تۇركىستان، سىعاناق، ار جاعىنداعى سارايشىق، بوكەي ورداسى، مىنا جاقتا  ۇلىتاۋ، كوكشەتاۋ جانە باسقا ءبىزدىڭ قالالارىمىز حاندىقتىڭ قۇرامىندا بولعان ەلدى مەكەندەر»، - دەدى ول.

اۆتور: مارلان جيەمباي