ب. سۇلتانوۆ قازاق حاندىعىنىڭ 550 جىلدىعىنا قاراستىرىلعان قاراجاتتىڭ كولەمىن اتادى

استانا. قازاقپارات - قازاق مەملەكەتتىلىگىنىڭ 550 جىلدىعىن جانە قازاقستان حالقى اسسامبلەياسىنىڭ 20 جىلدىعىن تويلاۋعا ارنالعان ءىس-شارالارعا 3 جىلعا 3 ميلليارد تەڭگە بولىنبەك.

بۇل تۋرالى ق ر قارجى ءمينيسترى باقىت سۇلتانوۆ ءمالىم ەتتى.

"مەملەكەت باسشىسىنىڭ قازاق حاندىعىنىڭ 550  جىلدىعىنا، سونداي-اق قازاقستان حالقى اسسامبلەياسىنىڭ 20  جىلدىعىنا ارنالعان ءىس-شارالاردى وتكىزۋگە قاتىستى بەرىلگەن تاپسىرمالارىن ىسكە اسىرۋعا، دەپۋتاتتاردىڭ ۇسىنىسىنا سايكەس، ءۇش جىلدىق بيۋدجەتتە شامامەن 3 ميلليارد تەڭگە ءبولۋ كوزدەلۋدە"، - دەدى مينيستر ق ر پارلامەنتى سەناتىنىڭ 2015-2017 - جىلدارعا ارنالعان بيۋدجەتتى تالقىلاۋعا ارنالعان وتىرىسىندا.

ونىڭ اتاپ كورسەتكەنىندەي، تىلدەردى دامىتۋ مەملەكەتتىك باعدارلاماسىن ىسكە اسىرۋ جالعاستىرىلاتىن بولادى. ول ماقساتقا جىل سايىن 3 ميلليارد تەڭگە جۇمساۋ قاراستىرىلۋدا.

اۆتور: جاسۇلان جولدىبايەۆ