قازاق حاندىعىنىڭ قۇرىلۋىنىڭ 550 جىلدىق مەرەيتويىنا لوگوتيپ جاساۋ كونكۋرسى جاريالاندى
بايقاۋعا قازاقستان رەسپۋبليكاسىندا تىركەلگەن بارلىق زاڭدى جانە جەكە تۇلعالار قاتىسا الادى. جۇمىستار 2014 - جىلدىڭ 18 - قاراشاسى، ساعات 18.00 گە دەيىن قابىلدانادى.
كونكۋرس تالابى بويىنشا قازاق حاندىعىنىڭ قۇرىلۋىنىڭ 550 جىلدىق مەرەيتويى لوگوتيپىندە قازاق حاندىعىنىڭ قۇرىلعان ۋاقىتىمەن ۇندەس كەلەتىن ەلەمەنتتەر مەن نىشاندار كورىنىس تابۋى، قازاق حاندىعىنىڭ قۇرىلۋىنىڭ تاريحي جولى مەن ونىڭ بۇگىنگى مۇراگەرى - تاۋەلسىز، بەيبىت دامىپ كەلە جاتقان ءبىرتۇتاس قازاقستان رەسپۋبليكاسىنىڭ اراسىنداعى اسقاق رۋحاني بايلانىس قامتىلۋى ءتيىس.
مەرەيتوي لوگوتيپىنىڭ ءتۇسى قازاقستان رەسپۋبليكاسىنىڭ مەملەكەتتىلىگىنىڭ نىشانى - مەملەكەتتىك تۋدىڭ تۇسىنە ۇقساس بولۋى قاجەت، ياعني بەيبىتشىلىك پەن بەرەكەنى سيپاتتايتىن كوگىلدىر اسپان تۇسىنە جانە ماڭگىلىك پەن تابىستىڭ سيمۆولى التىن كۇننىڭ تۇسىنە باسىمدىق بەرىلەدى.
كونكۋرسقا كاسىبي سۋرەتشىلەر، ارلەۋشىلەر، يلليۋستراتورلار، ونەر قايراتكەرلەرى قاتىسا الادى. 2014 - جىلعى 22 - قاراشاعا دەيىن ساراپتاۋ كوميسسياسى كونكۋرس جەڭىمپازىن انىقتايتىن وتىرىس وتكىزەدى.
جەڭىمپاز كونكۋرس كوميسسياسى مۇشەلەرىنىڭ كوپشىلىك داۋىس بەرۋى ارقىلى انىقتالادى. كونكۋرس جەڭىمپازىنا 365000 (ءۇش ءجۇز الپىس بەس مىڭ) تەڭگە كولەمىندە سىياقى بەرىلەدى.
كونكۋرس شارتتارىمەن تولىق مىنا جەردەن تانىسۋعا بولادى.
