قازاق حاندىعىنىڭ 550 جىلدىعىنا وراي وتەتىن «ەۋرازيا بارىسى» تۋرنيرىنە 8 ەلدىڭ بالۋاندارى قاتىسادى
تۋرنير قازاق حاندىعىنىڭ 550 جىلدىعىنا وراي، 9- قازاندا تاراز قالاسىنداعى «تاراز-ارەنا» سپورت كەشەنىندە وتەدى. بۇل تۋرالى قازاق كۇرەسى فەدەراتسياسىنىڭ باسپا ءسوز قىزمەتىنەن حابارلاندى.
«بوزكىلەمدە گرۋزيا، قازاقستان، قىرعىزستان، موڭعوليا، پولشا، رەسەي، تۇركيا جانە وزبەكستان ەلدەرىنىڭ كوماندالارى كەزدەسەدى دەپ كۇتىلۋدە. ءاربىر قۇرامادا جەتى بالۋان كۇرەسەدى. بيىلعى ەرەكشەلىك سالماق دارەجەسىندە ءبىرقاتار وزگەرىستەر بار. «ەۋرازيا بارىسىندا» بالۋاندار كوماندالىق سىندا 55 كەلى، 66 كەلى، 74 كەلى، 82 كەلى، -90 كەلى، 100- كەلى جانە 100+ كەلى سالماق دارەجەسىندە كۇرەسەدى.
تۋرنيردە قازىلىق جاسايتىن حالىقارالىق تورەشىلەر قۇرامىندا قاتىساتىن مەملەكەتتىڭ وكىلدەرى دە كىرەدى»، دەلىنگەن باسپا ءسوز بايانىندا.
قازاق كۇرەسىنەن حالىقارالىق «ەۋرازيا بارىسى» تۋرنيرى ەڭ العاش رەت 2013-جىلدىڭ جەلتوقسان ايىندا وتكەن بولاتىن. وعان ەۋرازيا قۇرلىعىنىڭ 8 مەملەكەتىنەن بالۋاندار قاتىستى. بۇل جارىس «قازاقستان بارىسى» قازاق كۇرەسىن دامىتۋ قورىنىڭ «قازاقستان بارىسى» مەن «جاس بارىس» جوباسىنان كەيىن قولعا العان ءۇشىنشى جوباسى. 2013-جىلعى تۋرنير جەڭىمپازدارى وتانداستارىمىز - قازاقستان قۇراماسى. ولار فينالدا موڭعوليا قۇراماسىنان 4:1 ەسەبىمەن باسىم ءتۇستى. ەكىنشى رەت ۇيىمداستىرىلعان تۋرنير 2014-جىلدىڭ قاراشا ايىندا بالۋان شولاقتىڭ 150 جىلدىق مەرەيتويىنا ارنالدى. وعان ازەربايجان، قىتاي، گرۋزيا، قازاقستان، قىرعىزستان، موڭعوليا، پولشا، رەسەي، تاجىكستان، تۇركيا، وزبەكستان جانە ۋكراينا ەلدەرىنىڭ كوماندالارى قاتىستى. فينالدا ەكىنشى رەت موڭعوليا قۇراماسى قازاقستان قۇرامالارى كەزدەسىپ، موڭعول بالۋاندارى جەڭىمپاز اتاندى.
«ەۋرازيا بارىسى» حالىقارالىق تۋرنيرىن تىكەلەي ەفيردە 7 ساعات بويى الەمنىڭ 126 مەملەكەتى تاماشالادى. بيىلعى حالىقارالىق كورسەتىلىمدە تۇركيالىق «ت ر ت اۆاز» بەن رەسەيلىك «بوەتس» ارنالارى تىكەلەي ەفيردە ۇسىناتىن بولادى. ال ەلىمىزدە «قازاقستان»، «KazSport»جانە «ك ت ك» ارنالارى كورسەتەدى.
اۆتور: قانات مامەتقازى ۇلى
