قازاق حاندىعىنىڭ 550 جىلدىعىندا شەتتەگى 5 ميلليون قازاقتىڭ تاعدىرى شەشىلۋى كەرەك
قۇرمەتتى اسقار يسابەك ۇلى!
ساناۋلى كۇندەردەن سوڭ تاۋەلسىز قازاق ەلى ەلباسى نۇرسۇلتان نازاربايەۆتىڭ باستاماسىمەن قازاق مەملەكەتتىلىگىنىڭ 550 جىلدىعىن اتاپ وتەدى.
قاراپ وتىرساق، كەرەي مەن جانىبەك 1465 جىلى العاشقى حاندىقتى قۇرعاننان باستاپ، بۇگىنگى تاۋەلسىز قازاق ەلىنە دەيىنگى بەس جارىم عاسىرداعى قازاقتىڭ بار ارمانى - الاش جۇرتىنىڭ باسىن قوسۋ، بىرىكتىرۋ، ءبىر شاڭىراق استىندا ءومىر ءسۇرۋ، ءبىر تەكتىلىكتى ساقتاۋدى ماقسات تۇتىپتى. بارلىق ارپالىسقان كۇرەس پەن قىزىل قىرمان قان توگىس تەك وسى ۇلى مۇرات ءۇشىن ءجۇرىلىپتى. سوندىقتان، الاش جۇرتى ءۇشىن بۇل تويدىڭ باسقا تويلارعا قاراعاندا ءمانى مەن ماڭىزى وتە زور، كوتەرەر جۇگى دە تىم اۋىر.
قۇدايعا تاۋبە! ۇلت كوشباسشىسىنىڭ ءوز سوزىمەن ايتساق، «قازىر ءوز تاعدىرىمىزدى ءوزىمىز شەشەمىز. ءوزىمىز وندىرگەندى ءوزىمىز پايدالانامىز. ءبىر ەلدىڭ باسشىسى كىم بولۋى كەرەكتىگى ماسكەۋدەگى ۇلكەن كابينەتتە شەشىلە سالىپ، بۇرىن- سوڭدى قازاق جەرىنە اياق باسىپ كورمەگەن كولدەنەڭ كوك اتتىلار ويىنا كەلگەنىن ىستەي المايدى. قازاق ەلىن بۇگىندە بۇكىل الەم تانيدى، ەكونوميكاسىنىڭ بولاشاعى مول، ساياسي احۋالى تۇراقتى، سان ءتۇرلى ۇلتتىڭ بالاسى تاتۋ تۇرىپ جاتقان وركەنيەتتى ەل دەپ بىلەدى، قۇرمەت تۇتادى. ەل باسشىسىن ءدۇيىم دۇنيەنىڭ پرەزيدەنتتەرى، يمپەراتورلارى، كورولدارى، موناحتارى، پرەمەرلەرى، ءسان- سالتاناتى جاراسقان راسىممەن قابىل الادى. الۋان- الۋان كومپانيالار مەن كونتسەرندەر، فيرمالار مەن قورلار ينۆەستيتسياسىن ءبولىپ، سەنىم كورسەتەدى. ەڭ باستىسى - قازاق حالقى ەگەمەن ەلى بار، تاۋەلسىز مەملەكەتى بار، وزگەلەرمەن تەڭ تۇرىپ، يىق تىرەستىرە الاتىن ۇلتقا اينالدى».
تاۋەلسىز قازاقستان دەگەندە، ءبىزدىڭ كوز الدىمىزعا ەڭ الدىمەن ونىڭ سۋ جاڭا استاناسى، الەمدىك تالاپقا ساي بەكىتىلگەن شەكاراسى، شەتتەن ورالعان ءبىر ميلليون قازاعى ورالادى!
ءبىزدىڭ ماڭگىلىك ەل بولۋىمىزدىڭ ەڭ نەگىزى ءۇش تىرەگى - نۇرسۇلتان نازاربايەۆتىڭ وسى ءۇش ۇلى ەڭبەگى بولاتىنىنا داۋ بولماسا كەرەك!
سول ءۇشىن دە بۇكىل قازاقتىڭ جانى شەكارا مەن استانانىڭ ۇستىندە تۇرۋعا ءتيىس. بۇكىل بيلىك اتاۋلى شەتتەگى بەس ميلليون قازاقتىڭ ەلگە ورالۋىنا قولايلى جاعداي جاساۋعا مىندەتتى!
الەمدىك داعادارىستار تۋىنداتقان قيىندىقتارعا قاراماستان استانا قۇرلىسى قارقىندى دامىپ كەلەدى.
شەكارا بەكىگەنىمەن شەكارالىق ايماقتاردىڭ كوبىنىڭ حالقى سيرەپ كەتتى. قاڭىراپ بوس قالعان اۋىلدار وتە كوپ. مەملكەتتى قورعايتىن ارميا ەمەس، حالىق. حالقى كوپ ەلدىڭ قاۋپى جوق.
شەتتەن كەلەتىن قازاق كوشى سوڭعى بەس- التى جىلدا تاۋەلسىز قازاقستان تاريحىندا بولماعان توقىراۋعا ۇشىرادى، توقتاپ قالۋعا تاياپ بارىپ، امان قالدى. 2013 -جىلى 10 -جەلتوقساندا قانداستارىمسىزعا ءتورت جىلسىز ازاماتتىق بەرىلمەيتىن ەتىپ قابىلدانعان قاتاڭ زاڭ قازىر ەلباسىمىزدىڭ تاپسىرماسىمەن پارلامەنتتە قايتا قارالۋ ۇستىندە. قانداستارمىزدىڭ تۇراقتى تىركەۋگە تۇرۋدا، ازاماتتىق الۋدا كەزدەسەتىن كەدەرگىلەر جويىلىپ، ۇلى كوشكە قايتا جول اشىلماق.
ءبىراق، بۇل دا جەتكىلىكسىز.
سەبەبى، قازىرگى كەزەڭدە كوشى- قون ساياساتىمەن اينالىساتىن پرەزيدەنت پەن ۇكىمەتكە تىكە قارايتىن ورگان جوق. ەڭبەك جانە حالىقتى الەۋمەتتىك قورعاۋ مينيسترلىگى قارماعىنداعى كوشى- قون كوميتەتىنىڭ دارمەنى بۇل شارۋانى اتقارۋعا جەتپەيدى.
سول ءۇشىن، «تۇڭعىش پرەزيدەنتتىڭ كوشى- قون قورىن» قۇرعان ءجون.
الدا كەلە جاتقان قازاق مەملەكەتتىگىنىڭ 550 جىلدىعىنا ارنالعان مارتەبەلى باس قوسۋدا وسى ماسەلە تويدىڭ كۇن تارتىبىنە ەنسە، شەتتەگى بەس ميلليون قازاقتىڭ تاعدىرى ماڭگىلىككە شەشىلەدى! 550 جىلدىققا ارنالعان تويدىڭ دا مارتەبەسى وزگە تويلاردان اسقاقتايدى، تاريحقا التىن ارىپپەن جازىلادى. ءسويتىپ، بابالار اماناتى ورىندالادى.
جوق جەردەن مەملەكەت قۇرعان يزرايل ەلگە ورالعان ءوز قانداستارىن كوشى- قون قورى قارجىسى ارقىلى قونىستاندىرىپ كەلە جاتقالى ءبىر عاسىردان استى. گەرمانيادا دا سولاي.
وسىدان ون ءۇش جىل بۇرىن ۇلت كوشباسشىسى نۇرسۇلتان ءابىش ۇلى نازاربايەۆ «تاعدىرىمىز سولاي بولىپ، اننان قاشقانداردى، مۇننان قاشقانداردى ەۆروپادان دا، ازيادان دا تىڭ جەردى كوتەرەمىز دەپ، قازاقتىڭ سانىن ازايتامىز دەپ، كوپ ۇلتتى بولدىق. ونى كەمشىلىك دەپ ساناماۋ كەرەك. ارتىقشىلىعىمىز دەپ ساناۋ كەرەك! سوندىقتان ءبىز ءار ۇلتتىڭ حالقىن باۋىرىمىزعا باسىپ ۇيرەنگەن حالىقپىز، ال ەندى شەتەلدەن كوشىپ كەلەمىز دەگەن ءوز قازاقتارىمىزدى باۋىرىمىزعا باسا المايمىز با، سوندا؟ ! مەن ويلايمىن، سەگىز جارىم ميلليون قازاق قازاقستاندا. مەنىڭشە، قازىر توعىز ميلليونعا جاقىندادى. سەبەبى، وسى جىلداردىڭ ىشىندە جارتى ميلليون قازاق كوشىپ كەلدى. سەگىز ميلليوندى ورتاشا ءۇش جارىمعا، تورتكە بولگەندە، قانشا جانۇيا بولادى؟ ! ەكى ميلليونعا جاقىن ءبىزدىڭ جانۇيامىز بار. ءتورت ميللينعا جاقىن جانۇيا ەكى قازاقتان شاقىرىپ اكەپ، اياعىنان تۇرعىزىپ جىبەرسە، سونشا قيىنشىلىق بولماس دەپ ويلايمىن سولارعا. بۇل ءبىزدىڭ ەلدىگىمىز بولىپ سانالار ەدى. دۇنيە جۇزىنە ءبىز وسىنداي ماعلۇمات، مالىمەت، تاجىريبە بەرەر ەدىك! » دەگەن بولاتىن. كەمەڭگەر تۇلعا تاعى بۇل ءسوزىن بۇكىل قازاقستانداعى قازاقتارعا ارناعان ەدى. مىنە، سونىڭ ءسات- ساعاتى بۇگىن تۋدى.
ءسوز جوق، جاڭا قازاقستاننىڭ بار جەتىستىگى ونىڭ تۇڭعىش پرەزيدەنتى بولعان نۇرسۇلتان نازاربايەۆتىڭ ەسىمىمەن تىكەلەي بايلانىستى. شەتتەگى قانداستارىمىزدى وتان قۇشاعىنا ورالتۋ دا، جوعارىدا دا ايتىلدى، ەلباسى ەرتە جولعا قويعان ۇلى ساياسات! قازاق، كوش ەندى توقتاماق ەمەس!
ارينە، تۇڭعىش پرەزيدەنتتىڭ اتىنداعى «كوشى- قون قورىن» قۇرۋ «نۇر وتان» پارتياسىنىڭ قۇزىرىنداعى جۇمىس ەمەس ەكەنىن ءبىز جاقسى بىلەمىز. ءبىراق، مەملەكەتتىڭ ەڭ ماڭىزدى ساياساتىن مۇلتىكسىز جۇرگىزۋ، الىستان كەلگەن اعايىندى پارتيا قاتارىنا، ەلباسى توڭىرەگىنە توپتاستىرۋ - باس پارتيانىڭ باستى قىزمەتتەرىنىڭ ماڭداي الدىسى بولۋى شارت. جاسىراتىنى جوق، باس پارتيا سوڭعى جىلدارى بۇل جۇمىستى اقساتىپ الدى.
قۇرمەتتى اسقار يسابەك ۇلى!
ءسىزدى جاڭا قىزمەتىڭىزبەن قۇتتىقتاي وتىرىپ، نۇرسۇلتان ءابىش ۇلىنىڭ سەنىمدى سەرىگى، ىسكەر تۇلعا رەتىندە، تاريحي ماڭىزى توتەنشە زور وسى ماسەلەنىڭ وسى 550 جىلدىققا ارنالعان باس قوسۋدا شەشىم تابۋىنا، ىسكە اسۋىنا ىقپال ەتەدى دەپ سەنەمىن!
بارشا جۇمىسىڭىزعا اللا ساتتىلىك بەرسىن!!!
قۇرمەتپەن، اقىن اۋىت مۇقيبەك
10.08.2015
استانا
"قامشى" سىلتەيدى
