قازاق حاندىعىنىڭ 550 جىلدىعىنا ارنالعان قويىلىمدا 500 اكتەر وينايدى
قازاق حاندىعىنىڭ جارتى مىڭجىلدىعىنا وراي اۋەزوۆ تەاترىنىڭ ۇجىمى اۋقىمدى سپەكتاكل دايىنداپ جاتىر. جابال ەرعاليەۆتىڭ «قيلى جول» شىعارماسىنىڭ جەلىسىندەگى قويىلىمعا كەرەي مەن جانىبەك تۇسىنداعى وقيعالار ارقاۋ بولعان. سپەكتاكلگە ۇزىن-ىرعاسى 500 دەن استام اكتەر قاتىسادى. جازعى دەمالىس ماۋسىمىنا قاراماستان، اۋەزوۆ تەاترىنىڭ ۇجىمى قازىر قىزۋ جۇمىس ىستەۋ ۇستىندە.
سونىمەن قاتار، شىعارمادا 1465-جىلعى ەلەۋلى وقيعا، ياعني كەرەي مەن جانىبەكتىڭ قازاق حاندىعىنىڭ قازىعىن قاققانى باياندالاتىنى ايتىلادى. 1 ساعاتقا جوسپارلانعان سپەكتاكلدە جانىبەك پەن كەرەيدىڭ ءابىلحايىر حاننان ءبولىنىپ، ازاتتىق پەن بوستاندىقتى ارمان ەتكەن قالىڭ قازاقتى ارتىنان ەرتىپ، ءبىر تۋ استىنا جيناعان كەزەڭى بەينەلەنەدى.
قويىلىمنىڭ قويۋشى-رەجيسسەرى اۋباكىر راحيموۆتىڭ ايتۋىنشا، قازىرگى كەزدەردە ءارتۇرلى ۇعىمدار، ءارتۇرلى الىپ قاشپا سوزدەر شىعىپ جاتىر. «قازاق ەلى بولماعان، قازاق مەملەكەت بولماعان، قازاقتىڭ جەرى بولماعان» دەگەن سوزدەر ايتىلىپ جاتىر. كەرەك دەسەڭىز، ءبىزدىڭ جەرىمىز اناۋ التايدان باستاپ، سوناۋ ەۋروپاعا دەيىن كەتىپ قالادى. ەۋروپاعا دەيىن، ەۋروپا حالقىنا، ريم يمپەرياسىنا ازاتتىق الىپ بەرگەن قازاق ەكەنىن ەستەن شىعارماۋىمىز كەرەك. سوندىقتان قازاق ەلى، مەملەكەتى دەگەن وسى تاريحي دۇنيە، كەرەي مەن جانىبەكتەن باستالادى. ءبىزدىڭ قويىپ جاتقان سپەكتاكلىمىز سول تۋرالى»، - دەدى قويۋشى-رەجيسسەر.
قويىلىمدا حاندىقتىڭ قالاي قۇرىلعانى، ول كەزدەگى تالاس-تارتىس، قيلى زامان ەگجەي-تەگجەيلى كورسەتىلەدى. اشىق اسپان استىندا، ۇلكەن ستاديوندا قويىلاتىن اۋقىمدى سپەكتالدە اۋەزوۆ تەاترى مەن تاراز قالاسىنىڭ 500 دەن استام ءارتىسى اتسالىسادى. 200 اكتەر جاۋىنگەردىڭ رولىندە ويناپ، ساحنالىق شايقاستارعا جاۋاپتى بولسا، 150 دەن استام ادام ءبي كورىنىستەرىن جاسايدى. ⅩⅤ عاسىرداعى كوشپەندى قازاقتىڭ باي مادەنيەتى قامتىلاتىن قويىلىمدى جۇتاڭ ەتىپ كورسەتپەۋ ءۇشىن ارنايى كوستيۋمدەر مەن بەزەندىرۋلەر ازىرلەنىپ جاتىر.
ال تەاتردىڭ باس سۋرەتشىسى ەسەنگەلدى تۇياقوۆ جاۋىنگەرلەردىڭ كيىمىن سيپاتتاپ بەردى. «ارنايى ساۋىت-سايمان، قارۋ-جاراعى بار 30 جاۋىنگەرلىك كوستيۋم تىكتىردىك. سونداي-اق 200 ساربازعا ارنالعان كيىم ۇلگىسىن جاسادىق. ولار دا ءارتۇرلى قىلىش، قالقاندارىمەن جانە نايزالارىمەن جاساقتالعان. قويىلىم الاڭدا وتەتىندىكتەن، اۋقىمدى ءارى كورەر كوزگە ەرەكشە اسەرلى، قىزىقتى بولۋى ءتيىس. سوندىقتان 3 قاباتتى اۋقىمدى دەكوراتسيالار قۇرامىز. اق كيىزگە وتىرعىزىپ، حان كوتەرۋ ءراسىمىن دە ەرەكشە كورسەتەمىز»، - دەدى تۇياقوۆ.
«قيلى جول» قويىلىمىن بارشا كورەرمەن قازان ايىندا تاراز قالاسىنىڭ ورتالىق ستاديونىندا تاماشالاي الادى. قازاق حاندىعىنىڭ جارتى مىڭجىلدىعىن تويلاۋ بارىسىندا جارىققا شىعاتىن سپەكتاكلگە ەلباسىنىڭ ءوزى ارنايى كەلىپ قاتىسادى دەپ جوسپارلانىپ وتىر.
