ماڭعىستاۋدا گاز باعاسىن ءبىر مەزگىلدە كوتەرگەن 54 بەكەتتىڭ يەسىنە ايىپپۇل سالىندى

اقتاۋ. قازاقپارات - ماڭعىستاۋدا سۇيىتىلعان مۇناي گازىنىڭ باعاسىن ءبىر مەزگىلدە كوتەرۋ تۇرىندە باسەكەلەستىككە قارسى كەلىسىم دەرەكتەرى انىقتالدى، دەپ حابارلايدى قازاقپارات ءتىلشىسى.

ماڭعىستاۋ وبلىستىق پروكۋراتۋراسى سۇيىتىلعان مۇناي گازى نارىعىنداعى زاڭدىلىقتاردىڭ جاي- كۇيىنە تەكسەرۋ جۇرگىزدى. ناتيجەسىندە، 54 گاز قۇيۋ بەكەتىنىڭ يەسىنە، سونداي- اق گاز وڭدەۋ زاۋىتىنا 60 ميلليون تەڭگەدەن استام سوماعا ايىپپۇل سالىنىپ، مونوپوليالىق تابىس تاركىلەنگەن.

«مەملەكەت باسشىسىنىڭ تاپسىرماسىنا وراي، تەكسەرىس جانە تالداۋ جۇمىستارى جۇرگىزىلدى. ناتيجەسىندە، ءبىرقاتار زاڭ بۇزۋشىلىق انىقتالدى. بارلىق كىنالى تۇلعالار سوت تارتىبىندە جاۋاپتىلىققا تارتىلدى»، - دەدى ماڭعىستاۋ وبلىسى پروكۋراتۋراسىنىڭ 3-باسقارما باستىعىنىڭ ورىنباسارى فايزۋللا جاڭابايەۆ.

سونداي- اق، ارنايى باعدارلامالاردىڭ كومەگىمەن ەلەكتروندىق ساۋدا الاڭدارىنىڭ قورىتىندىلارىن بۇرمالاۋ ءۇشىن سۇيىتىلعان مۇناي گازى نارىعىنداعى سۋبەكتىلەردىڭ ءسوزبايلاسۋى انىقتالدى. بۇگىندە كىنالى تۇلعالارعا قاتىستى قىلمىستىق ءىس راقىمشىلىق اكتىسى بويىنشا توقتاتىلعان.

پروكۋراتۋرا سۇيىتىلعان مۇناي گازى نارىعىنداعى باسەكەلەستىككە قارسى ارەكەتتەرگە جول بەرمەۋ تۋرالى ەسكەرتەدى.

اۆتور

ينديرا ساتەنباي