الماتى وبلىسىندا ونەركاسىپ ءوندىرىسىنىڭ كولەمى 540 ميلليارد تەڭگەگە جەتتى

 تالدىقورعان. قازاقپارات- الماتى وبلىسىنىڭ اكىمى اماندىق باتالوۆتىڭ توراعالىعىمەن وتكەن جيىندا بيىلعى جىلدىڭ 9 ايىنداعى وبلىستىڭ الەۋمەتتىك- ەكونوميكالىق دامۋ قورىتىندىلارى مەن 4- توقسانعا قويىلعان مىندەتتەر تالقىلاندى،

دەپ حابارلايدى قازاقپارات ءتىلشىسى وبلىس اكىمىنىڭ باسپا ءسوز قىزمەتىنە سىلتەمە جاساپ.

 نەگىزگى باياندامانى وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى جومارت ءامىرحانوۆ جاسادى. ج. ءامىرحانوۆتىڭ ايتۋىنشا، وبلىستا ونەركاسىپ ءوندىرىسىنىڭ كولەمى 540,0 ميلليارد تەڭگەنى قۇرادى. 44 جاڭا نىسان ىسكە قوسىلىپ، جۇمىس ىستەپ تۇرعان 25 نىسان كەڭەيتىلدى، قوسىمشا 1191 جۇمىس ورنى قۇرىلدى. كارتا شەڭبەرىندە قۇنى 55 ميلليارد تەڭگە بولاتىن 7 جوبا پايدالانۋعا بەرىلىپ، 1475 جۇمىس ورنى قۇرىلدى. بۇگىنگى كۇنى 2 نىسان ىسكە قوسىلدى - قاراتال اۋدانىنداعى «الماتى شىنى» جانە مەتالل قۇراستىرىلىمدارىن وندىرەتىن «PSI StroyIndustry»   زاۋىتتارى. اۋىل شارۋاشىلىعىندا جالپى ءونىم 459,6 ميلليارد تەڭگە بولىپ، ءوسىم 1,6 ميلليارد قۇرادى. بيىلعى جىلى ا و ك نىساندارىنا بولىنگەن مەملەكەتتىك قولداۋ بيۋدجەتتىك قارجىسى 33,9 ميلليارد تەڭگە، ونىڭ ىشىندە سۋبسيديي - 25,7 ميلليارد تەڭگە.

9-ايدىڭ ىشىندە وبلىس ەكونوميكاسىنا 349,8 ميلليارد تەڭگە ينۆەستيتسيا تارتىلدى، ناقتى كولەم يندەكسى 89,4 پايىز. بيۋدجەتتەن تىس ينۆەستيتسيا تارتۋ جولدارىنىڭ ءبىرى - مەملەكەتتىك- جەكەشەلىك ارىپتەستىكتى دامىتۋ. قازىرگى كەزدە وبلىس قورجىنىندا جالپى قۇنى 216 ميلليارد تەڭگەنىڭ 33 جوباسى بار.

سونىمەن قاتار بايانداماشى شاعىن جانە ورتا بيزنەستى، الەۋمەتتىك جانە تۇرعىن ءۇي- كوممۋنالدىق شارۋاشىلىق سالالارىن دامىتۋ، قۇرىلىس كولەمىن ارتتىرۋ ماسەلەلەرى تۋرالى ايتىپ ءوتتى.

اۆتور: سامال قابىشيەۆا