كوكشەتاۋدا اعارتۋشىلىق عۇمىرى 540 جىلدى قۇرايتىن اۋلەت ۇلتتىق بايقاۋ جەڭىمپازى اتاندى
بۇگىنگى كۇنى وبلىستا 4663 كوپ بالالى وتباسى بار، 8191 كوپ بالالى انا تىركەلگەن.
ولاردىڭ ىشىندە 2938 ى «التىن القا» يەگەرلەرى، ال «كۇمىس القا» 3970 اناعا تيەسىلى. سونداي-اق 591 ايەل «قاھارمان انا» اتاعىنا لايىق دەپ تانىلعان. سونداي-اق وڭىرىمىزدە ءى جانە Ⅱ دارەجەلى «انا داڭقى» وردەندەرىمەن ماراپاتتالعان نازىك جاندىلار بار، ولاردىڭ سانى 692 گە جەتەدى.
ەلباسى ن. نازاربايەۆتىڭ باستاماسىمەن 2013 - جىلدان باستاپ قولعا الىنعان «مەرەيلى وتباسى» ۇلتتىق بايقاۋى بيىل ەلىمىزدىڭ تۇكپىر-تۇكپىرىندە ۇيىمداستىرىلۋدا. بۇل وڭىردە بايقاۋ العاشقى رەت وتكىزىلىپ وتىر.
وبلىستىق اكىمدىك پەن وبلىستىق ىشكى ساياسات باسقارماسىنىڭ مۇرىندىق بولۋىمەن وتكەن بۇل جولعى ۇلتتىق بايقاۋدىڭ وبلىستىق كەزەڭىنىڭ قورىتىندىسى بويىنشا اقكول اۋدانىنان قاتىسقان مۇقاشيەۆتار وتباسى جەڭىمپاز اتاندى. وسىناۋ شاراعا قاتىسقان وبلىس اكىمى قوسمان ايتمۇحامەتوۆ مۇقاشيەۆتار وتباسىنا شيپاجايعا جولدامانى تابىس ەتىپ، اتالعان بايقاۋدىڭ وبلىستىق كەزەڭىنە قاتىسقان جۇلدەگەرلەردى ماراپاتتادى. ەندى ولار رەسپۋبليكالىق بايقاۋدا وبلىستىڭ مەرەيىن ۇستەم ەتپەك.
«ۇستازدىق ەتكەن جالىقپاس، ۇيرەتۋدەن بالاعا» دەگەندەي مۇقاشيەۆ ەشمۇقان مۇقاش ۇلىنىڭ سەگىز پەرزەنتىنىڭ بەسەۋى اكە جولىن قۋىپ، ۇستازدىقتى تاڭداپتى. بۇل اۋلەتتىڭ اعارتۋشىلىق جولىنداعى عۇمىرى 540 جىلدى قۇرايدى ەكەن.
ەكىنشى جانە ءۇشىنشى جۇلدەلى ورىندارعا يە بولعان باتىرحانوۆتار مەن كولەسنيكتەر وتباسىلارى ءۇي كينوتەاترىنا يە بولدى. بۇركىتباي ءماسىپ ۇلى باتىرحانوۆ كەشەگى وتكەن سۇراپىل سوعىستىڭ كۋاگەرى، ۇلى وتان سوعىسىنىڭ ارداگەرى، قازاق مادەنيەتىنىڭ ەڭبەك سىڭىرگەن قىزمەتكەرى، كوكشەتاۋ قالاسىنىڭ قۇرمەتتى ازاماتى، بۇگىندە ونىڭ ۇرپاعى ەل يگىلىگى ءۇشىن ايانباي ەڭبەك ەتۋدە. ال نيكولاي كولەسنيك ەگىندىكول اۋدانىندا ەڭبەك ەتىپ، عۇمىر بويى تراكتورشى، كومباينشى بولىپ تەر توككەن، قازىرگى كۇنى «كولەسنيك» شارۋا قوجالىعىن باسقارادى ەكەن.
قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق - دەموگرافيالىق ساياسات جونىندەگى ۇلتتىق كوميسسيانىڭ مۇشەسى، قازاقستان رەسپۋبليكاسى باس پروكۋراتۋراسى كوميتەتىنىڭ ءتورايىمى، گەنەرال-مايور ساۋلە ايتپايەۆا سالتاناتتى ءىس-شارانىڭ قۇرمەتتى قوناعى بولدى. ول 318 جىلدان بەرى ۇرپاقتارى تەمىرجول سالاسىندا ەرەنبەي ەڭبەك ەتىپ كەلە جاتقان سۇلەيمەنوۆتەر اۋلەتى مەن 112 جىل بويى حالىقتىڭ دەنساۋلىعى ءۇشىن قىزمەت كورسەتىپ كەلە جاتقان ءىلياسوۆتار وتباسىلارىن «وتباسىلىق اۋلەت» اتالىمدارىمەن ماراپاتتادى.
سالتاناتتى كەشتە وبلىستىق ءماسليحاتتىڭ حاتشىسى نينا دياچەك تە ءسوز سويلەپ، زالعا جينالعان وتباسىلارعا يگى تىلەكتەرىن ارنادى. سونىمەن بىرگە ءتۇرلى ۇلت وكىلدەرىنەن 8 بالا اسىراپ الىپ، تاربيەلەپ وتىرعان بۋرابايلىق قوبىلبايەۆتار وتباسىنا «مەيىرىمدىلىك»، كارىموۆتەر وتباسىنا «بەلسەندى قاتىسقاندارى ءۇشىن» جانە جاقىندا عانا وتاۋ قۇرعان تيمۋر مەن التىناي ىسقاقوۆتارعا «ۇزدىك جاس وتباسى» اتالىمدارىن جانە ىنتالاندىرۋ سىيلىقتارىن تابىستادى.
مەرەكەلىك كەش سوڭىندا وبلىستىڭ تالانتتى ونەرپازدارى اسەم اننەن شاشۋ شاشىپ، كۇمىس كۇيدى كۇمبىرلەتىپ، جينالعاندارعا جاقسى كوڭىل-كۇي سىيلادى.
