ناۋقاس ءبىر كۇندە 52 ءتىسىن ەمدەتكەن: مەديتسينالىق ساقتاندىرۋ اياسىندا جالعان دارىگەر قابىلداۋىن جاساعاندار انىقتالدى
ياعني، دارىگەرلەر ناۋقاس ەم الدى دەپ كورسەتەدى، الايدا شىن مانىندە ول ادام مەديتسنا مامانىنىڭ قابىلداۋىنا ءوزى ەركىمەن جازىلماعان.
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگىدە مەديتسينالىق ساقتاندىرۋ قورى ءتوراعاسىنىڭ ورىنباسارى ءىلياس مۇحامەدجان ءمالىم ەتتى، دەپ حابارلايدى قازاقپارات ءتىلشىسى.
«2023 -جىلدىڭ 6 ايىندا جالپى سوماسى 212,4 ميلليون تەڭگەگە 22,9 مىڭ جالعان جازبا انىقتالدى. ولاردىڭ ىشىندە پاتسيەنتتەرگە ءبىر كۇندە بىرنەشە رەت ستوماتولوگيالىق قىزمەت كورسەتۋ فاكتىلەرى بار. مىسالى، ءبىر ناۋقاس ءبىر كۇندە 52 ءتىسىن ەمدەتكەن. ياعني، ورىنداۋشىلار كورسەتىلگەن قىزمەتتەر سانىن كوبەيتىپ جازا بەرگەن. سول سياقتى 1 قىزمەتكەر 1600 مىڭنان استام ماسساج قىزمەتىن كورسەتتى دەپ جازىلعان. ياعني، ول كۇنىنە ۇزاقتىعى 30 مينۋتتان 80 رەت ماسساج جاساپ وتىرعان. ال ەسەپتەپ قاراساق، بۇل ءۇشىن وعان كۇنىنە 40 ساعات ءۇزىلىسسىز جۇمىس ىستەۋ كەرەك ەمەسپە؟ !» ، - دەپ انىقتالعان ولقىلىقتارعا توقتالدى ءىلياس مۇحامەدجان.
سونداي- اق ول اۋرۋحانادا ەمدەلىپ جاتقان ناۋقاستارعا ءبىر مەزگىلدە ەمحانادا دياگنوستيكالىق قىزمەت كورسەتىلگەنى تۋرالى فاكتىلەر انىقتالعانىن اتاپ ءوتتى. بۇعان قوسا، قايتىس بولعان ادامداردى تىركەۋ، مارقۇمدارعا ءدارى- دارمەك تاعايىنداۋ جاعدايلارى دا اشكەرە بولعان.
