اقتوبەدەگى 52 ادامنىڭ ءومىرىن قيعان ورتكە قاتىستى العاشقى بولجام ايتىلدى
دەپارتامەنت باسپا ءسوز قىزمەتىنىڭ وكىلى ۆيتالي سينيەۆتىڭ سوزىنە سۇيەنسەك، ورتكە اۆتوبۋستا بولعان قىسقا تۇيىقتالۋ سەبەپ بولۋى مۇمكىن.
«اۆتوبۋس توقتادى، جۇرگىزۋشىلەر قوعامدىق كولىكتەن جۇگىرىپ شىقتى. جولاۋشىلار ەسىككە بەتتەگەنىمەن، شەتكىسى جابىق بولعان»، - دەيدى سينيەۆ.
سونداي- اق، اۆتوبۋستا كوپ مولشەردە جاعارماي بولعان بولۋى مۇمكىن. سوندىقتان دا كولىك بىردەن الاپات ورتكە ورانعان. جولاي بەكەتكە توقتاي بەرمەۋ ءۇشىن جاعارمايدى ارتىعىمەن العان دەگەن بولجام ايتىلدى.
بەيرەسمي اقپاراتقا سۇيەنسەك، اۆتوبۋس جاڭادان جابدىقتالعاندىقتان، جولاۋشىلار تەرەزەدەن شىعا الماعان.
ايتا كەتەيىك، بۇگىن تاڭعى ساعات 10.30 شاماسىندا «يكارۋس» جولاۋشىلار اۆتوبۋسىندا ءورت شىققان. اۆتوبۋستىڭ ىشىندە 57 ادام بولعان. وقيعا ورنىندا 52 ادام قازا تاپتى، ولاردىڭ بارلىعى وزبەكستان ازاماتتارى. بەس ادام امان قالىپ وتىر، قولدارىن عانا كۇيىك شالعان.
