الماتىدا 51 جاستاعى ايەل تۇڭعىش رەت انا اتاندى - كەسكىن
قالاداعى پەريناتولوگيا ورتالىعىندا 30 جىلدان بەرى قۇرساق كوتەرە الماي كەلگەن كەلىنشەك، دۇنيەگە قىز بالا اكەلدى. دارىگەرلەردىڭ ايتۋىنشا، بۇل جاستاعى ايەلدەردىڭ العاش رەت بوسانۋى - ەرەكشە قۇبىلىس ەكەن.
بۇل تۋرالى الماتى تەلەارناسى حابارلايدى.
تۇڭعىشىن باۋىرىنا باسىپ، اينالىپ-تولعانىپ جاتقان ساندۋعاش قۇسمەتايەۆا بۇل قۋانىشتى ءساتتى تۋرا 30 جىل كۇتكەن. 51 جاسىندا العاش رەت ءسابي سۇيگەن انا، ۇزاق جىلدان بەرى بالا كوتەرە الماي كەلگەن. وتاعاسى ەكەۋى ءبىر پەرزەنتكە زار بولىپ، بارماعان جەرى، باسپاعان تاۋى قالماپتى. ءتىپتى، ەمشىلەردىڭ دە الدىنان ءوتىپ، ۇزاق ۋاقىت ەم قابىلداعان. تاعدىردىڭ مۇنداي سىنىنا توزە بىلگەن وتباسىندا 30 -جىلدان سوڭ ءسابي دۇنيەگە كەلدى.
«وسى كۇنگە دە جەتتىك، اۋەلى اللانىڭ ارقاسى. اللادان تىلەپ وتىردىق ءار ۋاقىتتا، ءۇمىتىمىزدى ۇزبەدىك. سول قىزىق قۋانىشقا مىنە جەتتىك دەپ ويلايمىز. اللانىڭ ارقاسى دەپ ايتامىن ارينە بىرىنشىدەن. نە ايتايىن، قۋانىشتىمىن ارينە. وسى ەندى ومىردە ءوزىم سياقتى ايەلدەرگە، وتباسىلارعا، انالارعا ءۇمىت ۇزبەسىن دەگىم كەلەدى»، - دەدى الماتى وبلىسىنىڭ تۇرعىنى، ساندۋعاش قۇسمەتايەۆا.
پەرزەنتىنە زارىعىپ جەتكەن انا قۋانىشتان كوز جاسىنا ەرىك بەردى. ايەلىنىڭ كوڭىلىنە مەدەۋ بولىپ، 30 جىلدان بەرى قولداۋ كورسەتىپ كەلگەن وتاعاسى دا قازىر تولقىپ ءجۇر. 51 جاسىندا العاش قۇرساق كوتەرگەن ساندۋعاش قۇسمەتايەۆا قاسكەلەڭ قالاسىندا تۇرادى ەكەن. ول الماتىداعى پەريناتولوگيا عىلىمي ورتالىعىنا جەرگىلىكتى دارىگەرلەردىڭ جولداۋىمەن 1-ناۋرىزدا تۇسكەن. ال، 9 -ناۋرىز كۇنى بوسانىپ، ومىرگە قىز بالانى اكەلدى.
«بۇل ەرەكشە جاعداي. وسى جاستاعى ايەلدەردىڭ العاش رەت بالا كوتەرۋى وتە سيرەك كەزدەسەتىن قۇبىلىس. سوندىقتان، قاۋىپ- قاتەرى دە جوق ەمەس. كوپ جاعدايدا ايەلدەردىڭ دەنساۋلىعى 30 دان كەيىن بالا كوتەرۋگە جاراي بەرمەيدى. ءبىراق، ساندۋعاش وتە جاقسى كۇتىنگەن. ءارى، الماتى وبلىسى دارىگەرلەرىنىڭ قاتاڭ باقىلاۋىندا بولعان. وسىنىڭ ارقاسىندا، امان- ەسەن بوساندى»، - دەدى اكۋشەريا، گينەكولوگيا جانە پەريناتولوگيا عىلىمي ورتالىعى «انا مەن بالا» ءبولىمىنىڭ مەڭگەرۋشىسى كاميل ساميتوۆ.
دارىگەرلەر انا مەن بالانىڭ دەنساۋلىعىنا قاۋىپ كەلتىرمەۋ ءۇشىن، كەسىر تىلىگىن جاساپتى. ءبۇلدىرشىننىڭ سالماعى 3 كەلىدەن اسقان.
قازىر كىشكەنتاي ءبۇلدىرشىن مەن ونىڭ اناسىنىڭ جاعدايى قالىپتى. دارىگەرلەر ولاردى ۇيلەرىنە شىعارىپ سالۋدى جوسپارلاپ وتىر. اق حالاتتىلاردىڭ سوزىنشە، بۇل جاستاعى ايەلدىڭ قۇرساق كوتەرۋى ەلىمىزدە سوڭعى 10 جىلدىقتا تىركەلگەن العاشقى جاعداي ەكەن.
مەديكتەردىڭ مالىمەتىنشە، ەلىمىزدە بالا تۋۋ كورسەتكىشى ايتارلىقتاي ارتىپتى. ماسەلەن، 1998 -جىلى قازاقستاندا بوسانۋ كورسەتكىشى 227 مىڭ 400 بولسا، بىلتىرعى جىلى بۇل سان 398 مىڭنان اسقان. ال، 1998 -جىلدان 2015 -جىلعا دەيىن 5 ميلليون 593 مىڭنان استام بوسانۋ دەرەگى تىركەلىپ، 5 ميلليون 593 مىڭ 573 بالا ومىرگە امان- ەسەن كەلگەن.
