جەتىسۋ وبلىسىندا شەنەۋنىك ءار جۇك كولىگىنەن 50 مىڭ تەڭگەدەن الىپ وتىرعان

تالدىقورعان. قازاقپارات - جەتىسۋ وبلىسى بويىنشا سىبايلاس جەمقورلىققا قارسى قىزمەت ۇلتتىق قاۋىپسىزدىك كوميتەتىنىڭ وبلىستىق دەپارتامەنتىمەن بىرلەسىپ، جەتىسۋ وبلىسى كولىكتىك باقىلاۋ ينسپەكسياسى باسشىسىنىڭ ورىنباسارىنىڭ زاڭسىز قىزمەتىنىڭ جولىن كەستى، دەپ حابارلايدى قازاقپارات.

انتيكوردىڭ مالىمەتىنشە، ول ءوزىنىڭ سەنىمدى ادامىنىڭ دەلدالدىعىمەن وبلىس اۋماعىندا جۇك كولىگىنىڭ كەدەرگىسىز ءجۇرىپ- تۇرۋى ءۇشىن كاسىپكەرلەردەن جۇيەلى نەگىزدە پارا الدى دەپ كۇدىكتەلۋدە. اي سايىنعى سىياقى سوماسى 1 اۆتوكولىك ءۇشىن 50000 تەڭگەنى قۇرادى.

«سوتتىڭ سانكسياسىمەن كۇدىكتى قاماۋعا الىندى. سوتقا دەيىنگى تەرگەۋ جالعاسۋدا. قىلمىستىق- پروتسەستىك كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى»، - دەپ جازدى ۆەدومستۆودان.

كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق- پروتسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.