اتا جولى كارتاسى: شەت ەلدەن قونىس اۋداراتىن 50 قانداس انىقتالدى

بۇل تۋرالى ۇكىمەت وتىرىسىندا كوشى-قون ساياساتى تۇجىرىمداسىن ىسكە اسىرۋ بارىسىن تالقىلاۋ كەزىندە پرەمەر-ءمينيستردىڭ ورىنباسارى- ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى قازاقپارات ءتىلشىسى.
«كوشى-قون ساياساتى تۇجىرىمداماسىنىڭ نەگىزگى باعىتتارى اياسىندا ىسكە اسىرىلىپ جاتقان نەگىزگى جۇمىستارعا توقتالايىن. ءبىرىنشى باعىت - ءبىلىم يمميگراتسياسى. مەملەكەت باسشىسى قازاقستاندى اكادەميالىق تۇرعىدان ۇتقىر جانە جەتەكشى عالىمدار مەن ماماندارعا تارتىمدى وڭىرلىك حابقا اينالدىرۋ ماسەلەسىن تاپسىرعان. وسى ورايدا زاماناۋي كامپۋستارى، عىلىمي زەرتحانالارى بار سالالىق ۋنيۆەرسيتەتتەر اشۋ ءۇشىن كەشەندى جۇمىس جۇرگىزىلىپ جاتىر. كەيىنگى 2 جىلدا قازاقستاننىڭ جوعارى وقۋ ورىندارىنىڭ بازاسىندا شەتەل جوعارى وقۋ ورىندارىنىڭ 6 فيليالى قۇرىلدى. ناتيجەسىندە، بيىل شەتەلدىك ستۋدەنتتەردىڭ ۇلەسى بارشا ستۋدەنتتەردىڭ 4,4 پايىزىنا دەيىن ارتتى»، - دەدى ت. دۇيسەنوۆا.
سونىمەن قاتار ول ەكىنشى باعىت ەلىمىزدىڭ ينۆەستيتسيالىق تارتىمدىلىعىن ارتتىرۋ ءۇشىن ناقتى شارالار قابىلداۋعا ارنالعانىن ايتتى.
«قازىر ا-5 ساناتىنداعى ينۆەستورلار شەتەلدەن جۇمىس كۇشىن تارتۋ ءۇشىن رۇقسات المايتىن بولدى. جىل باسىنان بەرى 76 شەتەل ازاماتىنا وسىنداي ينۆەستور ۆيزاسى بەرىلدى (2022 -جىلى-95 ۆيزا). الەۋەتتى ينۆەستورلارعا شەتەلدەگى مەكەمەلەرىمىزدەن «ءبىر ءوتىنىش» قاعيداتى بويىنشا جەكە سايكەستەندىرۋ ءنومىرىن جانە ەلەكتروندى سيفرلى قولتاڭبا بەرۋ ءراسىمى جەڭىلدەتىلدى. بۇدان بولەك، ينۆەستور-بيزنەسمەندەردىڭ ينۆەستيتسيالىق ۆيزا الۋىنا قاجەت تومەنگى شەكتى ازايتۋ قاراستىرىلىپ وتىر. ا-6 دەپ اتالاتىن ۇزاق مەرزىمدى جاڭا ينۆەستورلىق ۆيزا ءتۇرى ەنگىزىلىپ جاتىر. مۇنداي ۆيزا يەلەرىنە ەلىمىزدىڭ اۋماعىندا تۇراقتى تۇرۋ ءۇشىن (10 جىلعا) ىقتيارحات الۋ قۇقىعى بەرىلەدى»، - دەدى ۆەدومستۆو باسشىسى.
«ال شەتەلدە تابىستى بيزنەستەرى بار ەتنوستىق قازاقتار ءۇشىن «اتا جولى» كارتاسىن بەرۋ ءتارتىبى بەكىتىلدى. بۇگىندە «وتانداستار» قورى قولىندا كاسىبى بار، ەلگە «اتا جولى» كارتاسى اياسىندا كەلەتىن شەت ەلدىك 50 قانداسىمىزدى انىقتاپ، ءتيىستى ءىس- شارالاردى اتقارىپ جاتىر»، - دەدى مينيستر.
اتاپ ايتقاندا، «اتا جولى» كارتاسى - ەتنيكالىق قازاقتارعا ەلىمىزدە بيزنەس- كەيستەرىن ىسكە اسىرۋعا جانە ەلدە تاپشى مامانداردىڭ قىزمەت ەتۋىنە بەرىلەتىن قۇجات. كارتا يەلەرىنە رەسپۋبليكا اۋماعىندا ازاماتتىقتارىن ساقتاي وتىرىپ، 10 جىلعا دەيىن تۇراقتى تۇرۋعا رۇقسات بەرىلەدى.