رەسەيدەن قازاقستانعا 50 كومپانيا كوشىپ كەلەدى - ءاليحان سمايىلوۆ
بۇل تۋرالى ق ر پرەمەر-ءمينيسترى ءاليحان سمايىلوۆ قازاقستان ماشينا جاساۋشىلارىنىڭ X فورۋمىنىڭ پلەنارلىق وتىرىسىندا ايتتى، دەپ حابارلايدى قازاقپارات ءتىلشىسى.
«شەتەلدىك ءوندىرىس ورىندارىنىڭ ەلىمىزگە رەلوكاتسياسى قازاقستاننىڭ ماشينا جاساۋشىلارىنا قانداي مۇمكىندىك بەرەدى؟» دەگەن سۇراق قويىلدى ۇكىمەت باسشىسىنا پلەنارلىق وتىرىستا.
«قازىرگى ساياسي جاعداي ۇلتتىق ەكونوميكامىزعا جاعىمسىز سىرتقى فاكتورلار اكەلدى، دەگەنمەن، بەلگىلى ءبىر مۇمكىندىكتەر دە تۋعىزادى. ازىرگە كورشى ەلدە ءوز ءوندىرىسىن جاۋىپ، كەڭسەلەرىن قازاقستانعا اۋىستىرۋعا نيەت بىلدىرگەن 50 گە جۋىق كومپانيا بار. ءبىز قازىر ولارمەن ناقتى كەلىسسوزدەر جۇرگىزىپ جاتىرمىز. ولارعا ارنايى ەكونوميكالىق ايماقتاردا ورىن بەرىلەدى، ينۆەستيتسيالار جونىندەگى زاڭنامادا كوزدەلگەن ارنايى ينۆەستيتسيالىق كەلىسىمدەرگە قول قويىلادى، ءوندىرىس قۇرىپ، تابىس تابۋ كەزەڭىنە سالىقتىق باسىمدىقتار بەرىلەدى»، - دەپ جاۋاپ بەردى ءا. سمايىلوۆ.
ونىڭ ايتۋىنشا، سەگىز ايدىڭ قورىتىندىسى بويىنشا ءبىزدىڭ ەكونوميكامىزداعى نەگىزگى كاپيتالعا ينۆەستيتسيا ناقتى ماندە %6 ءوستى.
I توقساننىڭ قورىتىندىسى بويىنشا تىكەلەي شەتەلدىك ينۆەستيتسيا اعىنى %54 ۇلعايعان.
«شەتەلدىك وندىرىستەردى رەلواكتسيالاۋ ەسەبىنەن قوسىمشا ينۆەستيتسيالاردىڭ كەلۋى - ارينە، جاڭا جۇمىس ورىندارىن قۇرۋ، سالىق سالۋ بازاسىن كەڭەيتۋ عانا ەمەس، جاڭا تەحنولوگيالار مەن جاڭا ستاندارتتار، وتاندىق ماشينا جاساۋشىلاردىڭ جانە جالپى وڭدەۋ سالاسىنداعى وندىرۋشىلەردىڭ باسەكەگە قابىلەتىن ارتتىرۋ، سوندىقتان ءبىز وسىنداي وندىرىستەردى رەلوكاتسيالاۋدى بارىنشا ىنتالاندىرا بەرەمىز»، - دەدى ۇكىمەت باسشىسى.
بۇعان دەيىن پرەمەر-مينيستر وتاندىق ماشينا جاساۋ سالاسىنىڭ رەسپۋبليكا ەكونوميكاسىنىڭ تۇراقتى دامۋىنا ەلەۋلى ۇلەس قوسىپ كەلە جاتقانىن ايتتى.
ماسەلەن، يندۋستريالاندىرۋ جىلدارى ماشينا جاساۋداعى ءوندىرىس كولەمى 6 ەسەگە ءوسىپ، 2,3 تريلليون تەڭگەگە دەيىن كوتەرىلدى.
سالانىڭ ءوسىمى سوڭعى 3 جىلدا ورتا ەسەپپەن %20 دى قۇراپ وتىر.
