وزبەكستان مەن قىرعىزستان 50 ميلليون دوللار كاپيتالى بار ينۆەستيتسيالىق قور قۇرادى
سايكەس كەلىسىم سادىر جاپاروۆتىڭ تاشكەنتكە ساپارى كەزىندە قابىلداندى، دەپ حابارلايدى قازاقپاراتتىڭ مەنشىكتى ءتىلشىسى.
«وزبەكستان مەن قىزعىزستان 50 ميلليون دوللار جارعىلىق كاپيتالى بار ينۆەستيتسيالىق قور قۇرادى. ءارى قاراي بۇل سومانى 200 ملن- عا جەتكىزۋ كوزدەلىپ وتىر»، - دەپ ءمالىم ەتتى ۆيتسە- پرەمەر، ينۆەستيتسيالار جانە سىرتقى ساۋدا ءمينيسترى ساردور ءومىرزاقوۆ.
وزبەكستان ۆيتسە- پرەمەرى قۇرىلاتىن قوردىڭ وزبەك- قىرعىز ارىپتەستىگىنىڭ دامۋىن تەزدەتەتىندىگىن ايتىپ ءوتتى.
«ينۆەستيتسيالىق قور ءبىرقاتار ورتاق جوبانى جۇزە اسىرۋعا كومەكتەسەدى. اسىرەسە، ونەركاسىپتىك كووپەراتسيا سالاسىندا. بىزگە بۇل جاعدايدى پايدالانىپ قالۋ كەرەك»، - دەپ ايتتى ءومىرزاقوۆ.
وزبەكستان مەن قىرعىزستان پرەزيدەنتتەرىنىڭ كەزدەسۋى ناتيجەسىندە وزبەك- قىرعىز ارىپتەستىگىنىڭ بارلىق باعىتىن قامتيتىن 22 قۇجاتقا قول قويىلدى. ولاردىڭ قاتارىندا وزبەك- قىرعىز ينۆەستيتسيالىق قورىنىڭ قۇرىلۋى تۋرالى كەلىسىم، 50 گە جۋىق ورتاق جوبانىڭ ىسكە اسىرىلۋىن كوزدەيتىن ونەركاسىپتىك كووپەراتسيانى كەڭەيتۋ مەن تەرەڭدەتۋ جونىندەگى پراكتيكالىق شارالاردىڭ جوسپارى، ءوزارا ەلەكتر قۋاتىن تاسىمالداۋ جانە قىرعىزستانداعى گيدروەنەرگەتيكا نىساندارىنىڭ قۇرىلىسى اياسىنداعى ارىپتەستىك تۋرالى قۇجاتتار بار.
سونىمەن قاتار سىرتقى ساياسي ۆەدومستۆولاردىڭ ءوزارا ارەكەتتەسۋ باعدارلاماسى، كەدەندىك ءىس سالاسىنداعى، اسكەري جانە اسكەري- تەحنيكالىق ارىپتەستىك، دەنساۋلىق ساقتاۋ، اۋىل شارۋاشىلىعى، ازىق- تۇلىك قاۋىپسىزدىگى، وسىمدىكتەر كارانتينى، ءبىلىم، عىلىم جانە مادەنيەت سالاسىنداعى ءبىرقاتار قۇجاتقا قول قويىلدى. ەسكە سالا كەتەيىك، كەشە قىرعىزستان باسشىسى شاۆكات ميرزيەيەۆتىڭ شاقىرتۋىمەن مەملەكەتتىك ساپارمەن تاشكەنتكە كەلدى.