كوروناۆيرۋس جۇقتىرۋ قاۋپى 50 جاستان اسقانداردا باسىم - زەرتتەۋ

نۇر-سۇلتان. قازاقپارات - الەمدە كوروناۆيرۋس جۇقتىرعاندار اراسىندا جالپى ءولىم كورسەتكىشى %1,38 پايىزدى قۇرايدى جانە بۇل ادامنىڭ جاسىنا بايلانىستى ارتىپ وتىرادى.

ياعني، 10 جاسقا دەيىنگى بالالار اراسىندا ءولىم كورسەتكىشى %0,0016 بولسا، 80 جاستان اسقانداردا %7,8 عا جەتەدى، دەپ حابارلايدى قازاقپارات The Guardian باسىلىمىنا سىلتەمە جاساپ.

«زەرتتەۋ ناتيجەلەرى كورسەتكەندەي، 10-19 جاس ارالىعىنداعى كوروناۆيرۋس جۇقتىرعاندار ستاتسيونارلىق ەم قابىلداعان. ال 80 جاستان اسقانداردىڭ 18 پايىزىن اۋرۋحاناعا جاتقىزۋ قاجەت بولعان»، - دەپ جازادى اۆتور.

زەرتتەۋ اۆتورلارىنىڭ ايتۋىنشا، ينفەكتسيانىڭ اۋىر ءوتۋى ورتا جاستاعى ادامدار اراسىندا دا بايقالعان.

«40 جاستان اسقانداردىڭ 4 پايىزى، 50 جاستان اسقانداردىڭ 8 پايىزى ستاتسيونارلىق ەم-دومدى قاجەت ەتكەن»، - دەپ جازادى اۆتور.

زەرتتەۋ قورىتىندىسى Lancet مەديتسينالىق جۋرنالىندا جاريالاندى.

زەرتتەۋ 70 مىڭنان استام ادامنىڭ ءاناليزى نەگىزىندە جاسالعان.

بۇل زەرتتەۋ ەلۋ جاستان اسقانداردا اۋرۋ جۇقتىرۋ قاۋپى باسىم ەكەنىن جانە ينفەكتسيا جۇقتىرعان كۇننىڭ وزىندە اسقىنۋ كوبىرەك بولاتىنىن كورسەتەدى.