ماجارستان قازاقستان ستۋدەنتتەرى ءۇشىن تاعى 50 وقۋ گرانتىن بولەدى
استانادا جەكەمەنشىك جانە مەملەكەتتىك بالاباقشا باعاسىن تەڭەستىرۋ مۇمكىنشىلىگى قاراستىرىلۋدا بيىل ەلوردا بالاباقشالارىنا 24 مىڭ بالا قابىلدانادى
بۇل تۋرالى ماجارستاننىڭ قازاقستانداعى توتەنشە جانە وكىلەتتى ەلشىسى باراني اندراش ورتالىق كوممۋنيكاتسيالار قىزمەتىندە ءمالىم ەتتى.
«وتكەن ايدا، 19 - اقپان كۇنى بۋداپەشت قالاسىندا قازاقستاندىق ستۋدەنتتەرگە ماجارستان تاراپىنان بولىنەتىن وقۋ گرانتى سانىن 200 دەن 250 گە كوبەيتۋ تۋرالى شەشىم قابىلداندى. بۇل جاڭالىققا وتە قۋانىشتىمىن. مەنىڭ ويىمشا، 2019-2020 - وقۋ جىلىندا 50 ادامعا كوبەيتىلگەن كۆوتا بويىنشا العاشقى كونكۋرس وتەدى» ، - دەپ مالىمدەدى ماجارستان ەلشىسى.
ەسكە سالا كەتسەك، ماجارستان ۇكىمەتىنىڭ قازاقستاندىق ستۋدەنتتەرگە تۋريزم سالاسى بويىنشا وقۋ گرانتىن كوبەيتەتىنى حابارلانعان ەدى.
قازاقستان مەن ماجارستان اراسىنداعى ىنتىماقتاستىق 2013 -جىلى باستالعان. اراداعى كەلىسىمگە سايكەس، ماجارستاندىق تاراپ قازاقستاندىق ستۋدەنتتەر ءۇشىن 45 گرانت (باكالاۆريات - 20, ماگيستراتۋرا - 20, دوكتورانتۋرا - 5) بولگەن بولاتىن. ءوز كەزەگىندە قازاقستان دا سەرىكتەس ەل ستۋدەنتتەرى ءۇشىن 45 گرانت ءبولدى.
2016 -جىلى ماجارستاندىق تاراپ ۇسىنىسىمەن كەلىسىمگە وزگەرىستەر ەنگىزىلىپ، گرانت سانى 45 تەن 200 گە كوبەيتىلدى. ياعني، 2017 -جىلدان باستاپ، ماجارستان ۇكىمەتى تاراپىنان قازاقستان ازاماتتارىنا 200 تولىق گرانت (باكالاۆريات - 90, ماگيستراتۋرا - 90, دوكتورانتۋرا - 20) ءبولىنىپ كەلەدى. قازاقستاندىق تاراپ بولەتىن گرانت كولەمى (45 گرانت) وزگەرىسسىز قالدى.
ب. اندراشتىڭ ايتۋىنشا، ماجارستاندىق گرانت تەگىن وقۋدى، اي سايىنعى شاكىرتاقىنى (باكالاۆريات - 130 ەۋرو، دوكتورانتۋرا - 450 ەۋرو) ، جاتاقحانا نەمەسە جالدانعان پاتەراقى قۇنىن (شامامەن 130 ەۋرو) جانە مەديتسينالىق ساقتاندىرۋدى قامتيدى.
بيىل ماجارستان بولەتىن 200 گرانتقا مىڭنان استام قازاقستاندىق ستۋدەنتتەر ءوتىنىم بەرگەن. ستيپەندياعا لايىقتى ستۋدەنتتەردى دەپۋتاتتار مەن قوعام قايراتكەرلەرىنەن، قازاقستانداعى ماجارستان ەلشىلىگى قىزمەتكەرلەرىنەن قۇرالعان قوعامدىق كوميسسيا ىرىكتەيدى.
