قىتايداعى وتباسىلاردىڭ 50 پايىزى ەكىنشى ءسابي سۇيگىسى كەلمەيدى - كەسكىن

استانا. قازاقپارات - قىتايداعى ەرلى- زايىپتىلاردىڭ جارتىسىنان كوبى ەكىنشى ءسابي سۇيگىسى كەلمەيدى، - دەپ حابارلايدى 24.kz ءتىلشىسى.

تاعى 25 پايىزى ەكى بالالى بولۋعا كۇمانمەن قارايدى. جالپى قىتايلىق ايەلدەر قاۋىمداستىعى جۇرگىزگەن الەۋمەتتىك زەرتتەۋ ناتيجەسى وسىنى كورسەتىپ وتىر. وسىلايشا اسپان استى ەلىندە وتكەن جىلدان بەرى «ءبىر وتباسىعا - ءبىر بالا» ساياساتى كۇشىن جويعانىمەن «بەيبي- بۋمنىڭ» اۋىلى الىس. ەكى بالالى بولۋعا نە كەدەرگى؟ ەكىنشى بالا تۋعىسى كەلمەيتىندەردىڭ باسىم كوپشىلىگى ەكونوميكالىق دامۋى قارقىندى ۇلكەن قالانىڭ تۇرعىندارى. مۇنداعى حالىقتىڭ 62 پايىزى ەكىنشى رەت ءسابي سۇيۋگە كوڭىلى داۋالامايدى. الەۋمەتتىك زەرتتەۋ ناتيجەسى وسىنداي. ساۋالناماعا قىتايدىڭ 10 پروۆينسياسى، 21 قالاسىندا تۇراتىن 15 جاسقا دەيىن بالاسى بار وتباسىلار قاتىسقان. اتا-انالار ماتەريالدىق جاعدايعا كوبىرەك الاڭدايتىنىن كورسەتىپ وتىر. بالانى باعىپ قاعۋ، وقىتىپ جەتكىزۋ تىم قىمبات دەپ ەسەپتەيدى. جالپى قىتايلىق ايەلدەر فەدەراتسياسىنىڭ وكىلى چەن سياوسيانىڭ ايتۋىنشا، رەسپوندەنتتەردىڭ %83 وسىلاي دەپ جاۋاپ بەرگەن.

 چەن سياوسيا، جالپىقى تايلىق ايەلدەر فەدەراتسياسىنىڭ وكىلى:

- ەكىنشى بالانى جوسپارلاعان اتا- انالار وتباسىلىق تاربيە بويىنشا ءارتۇرلى كەڭەسكە مۇقتاج. ولاردىڭ 78 پايىزى بالالار ورتالىعى، بالاباقشا، باستاۋىش جانە ورتا مەكتەپتەردەن اقىل كەڭەس الساق دەيدى. ال 43 پايىزى جوعارى بىلىكتى ماماندارمەن اقىلداسۋدى قالايدى.

2016 -جىلى قىتاي ۇكىمەتى «ءبىر وتباسى - ءبىر بالا» ساياساتىن الىپ تاستادى. ءبىراق بيلىك كۇتكەندەي «بەيبي بۋم» بولمادى. 70 -جىلداردى ەنگىزىلگەن شەكتەۋ قىتايلىقتاردىڭ قانىنا ءسىڭىپ كەتكەن سىڭايلى. ءبىزدىڭ بليتس- ساۋالناماعا جاۋاپ بەرگەن ەرلى- زايىپتىلاردىڭ كوبى ەكىنشى بالا سۇيۋگە قۇلىقتى ەمەس.

يان ليچۋن، بەيجىڭ قالاسىنىڭ تۇرعىنى:

- مەن ازىرگە ەكىنشى بالا تۋرالى ويلامايمىن. بىرىنشىدەن بىزدە وعان ۋاقىت جوق، كۇندەلىكتى جۇمىستان بوسامايمىز. ەكىنشىدەن، بالانى وقىتۋعا اجەپتاۋىر قاراجات كەرەك. سوندىقتان ءبىز بارلىق كۇش جىگەرىمىزدى وسى ۇلىما عانا ارناساق دەيمىز.

ۆەي نين، بەيجىڭ قالاسىنىڭ تۇرعىنى:

- مەن تاعى دا جۇكتى بولۋعا قارسى ەمەسپىن. قازىر كوپتەگەن قىزمەتتەستەرىم ەكىنشى بالانى جوسپارلاپ ءجۇر. اسىرەسە جاسى قىرىقتارداعى تانىستارىم ءسابيلى بولعىسى كەلەدى.
ساراپشىلاردىڭ ايتۋىنشا، ەكولوگيالىق ماسەلە مەن مەديتسينالىق قىزمەتتىڭ جەتىسپەۋشىلىگى دە قىتايلىق ەرلى- زايىپتىلاردى تەجەپ وتىر. ال جەلتوقساندا عانا جاريا بولعان رەسمي ستاتيستيكا دا قىتايلىق جاستاردىڭ نەكەگە تۇرۋعا دا اسىقپايتىنىن كورسەتتى. قازىر ەلدە جالعىزباستى جانداردىڭ سانى 200 ميلليونداي. ولاردىڭ %36 سانالى تۇردە نەكەسىز ءومىردى تاڭداعان قىزدار ەكەن.