نۇرسۇلتان نازاربايەۆ استانانىڭ قۇرىلىسى ءۇشىن ءتۇن ورتاسىندا 50 ميلليون دوللار ىزدەگەن
مەملەكەت باسشىسى بۇل ەستەلىگىن «تاۋەلسىزدىك تاعىلىمى» اتتى تەلەجوبا كەزىندە ايتىپ بەردى.
«مەنىڭ ەسىمدە، سەن جاقسى مينيستر بولدىڭ... استانانىڭ قۇرىلىسى توقتاپ قالعان كەزدە، مەن سەنى تۇنگى ساعات 02.30-دا وياتىپ، «قۇرىلىسشىلارعا تولەيتىن 50 ميلليون دوللار تاپ دەگەنىم ەسىمدە»، - دەدى مەملەكەت باسشىسى ا. پاۆلوۆقا قاراتا ايتقان سوزىندە.
الەكساندر پاۆلوۆ راسىمەن دە ونداي وقيعانىڭ بولعانىن ەسكە الدى.
«ايتپاقشى، سول كەزدە ءبىزدىڭ ءالى ۇكىمەتتىك بايلانىسىمىز ورناماعان كەز ەدى. كەڭەس وداعىنان قالعان قوڭىراۋلار بولاتىن. ونى قولدانعان ادامدار جاقسى بىلەدى، داۋىسى دابىل سياقتى. تۇندە الماتىنىڭ جارىعى ساعات 23.00-دەن كەيىن سونەتىن، ەسىڭىزدە شىعار؟ ءبىز ءالى جۇمىستا وتىرعان ەدىك، سول كەزدە قوڭىراۋ كەلدى دە «پرەزيدەنتپەن سويلەسەسىز بە؟» دەگەن سۇراقتى ەستىدىم. بۇل ارينە، قالجىڭ شىعار دەپ وتىرعامىن، ءبىراق، ءبىر مەزەتتە نۇرسۇلتان ءابىش ۇلىنىڭ داۋىسىن ەستىدىم. پرەزيدەنت «ۇيىقتاپ جاتىرسىڭ با؟» دەپ سۇرادى. مەن «جوق، جۇمىستا وتىرمىن» دەدىم. «تىڭدا، تاڭەرتەڭگە دەيىن 50 ميلليون دوللار تابۋ كەرەك»، - دەدى پرەزيدەنت. ول كەزدە بۇل اقشانى تابۋ وڭاي ەمەس ەدى. ءبىراق، تاپتىق. سول كەزدە تۇسىنگەنىم، مەملەكەت باسشىسى تۇندە دە ۇيىقتاماي جۇمىس ىستەيدى ەكەن»، - دەپ ەسكە الدى ا. پاۆلوۆ.
ەلباسى نۇرسۇلتان نازاربايەۆتىڭ تۇندە جۇمىس ىستەيتىنىن استانانىڭ العاشقى اكىمى بولعان ادىلبەك جاقسىبەكوۆ تە بىلەدى ەكەن.
«مەنى تۇنگى ساعات 01.30-دا اكىم ەتىپ تاعايىنداعان. مەنى تۇندە شاقىرعان نۇرسۇلتان ءابىش ۇلى «ەرتەڭ سەنى اكىم ەتىپ تاعايىندايمىن. بۇل مەنىڭ ومىرىمدەگى ەڭ ماڭىزدى جوبا، سوندىقتان، سەنەن جاۋاپ الامىن» دەدى. مەملەكەت باسشىسى تۇندە دە تىنباي جۇمىس ىستەيدى»، - دەپ ەسكە الدى ءا. جاقسىبەكوۆ.
اۆتور: كەنجەكەي توقتامۇرات قىزى
