قازاقستاندا بيزنەستىڭ 50 پايىزى ايەلدەردىڭ يەلىگىندە
بۇل تۋرالى بۇگىن قازاقستان رەسپۋبليكاسىندا 2006-2016-جىلدارعا ارنالعان گەندەرلىك تەڭدىك ستراتەگياسىن ىسكە اسىرۋدىڭ الدىن الا قورىتىندىلارىنا ارنالعان حالىقارالىق كونفەرەنتسيا بارىسىندا ەلىمىزدىڭ مەملەكەتتىك حاتشىسى گۇلشارا ءابدىقالىقوۆا ايتتى.
«ايەلدەردىڭ ەكونوميكالىق مۇمكىنشىلىكتەرى كەڭەيە تۇسۋدە. ۇلتتىق كوميسيا مەن مەملەكەتتىك وكىلەتتى ورگانداردىڭ بىرلەسكەن كۇش-جىگەرىنىڭ ارقاسىندا رەسپۋبليكادا ايەل كاسىپكەرلىگى سەكتورى قارقىندى قالىپتاستى.
2006-2016-جىلدارعا ارنالعان گەندەرلىك تەڭدىك ستراتەگياسى جۇزەگە اسىرىلعانعا دەيىن بيزنەستەگى ايەلدەردىڭ ۇلەسى 38 پايىز بولسا، بۇگىندە 50 پايىزعا جەتتى»، - دەدى گ. ءابدىقالىقوۆا.
مەملەكەتتىك حاتشىنىڭ ايتۋىنشا، 2006-جىلى ايەلدەر اراسىنداعى جۇمىسسىزدىق دەڭگەيى 9,2 پايىز بولسا، 2015-جىلى بۇل كورسەتكىش 5,6 پايىزعا دەيىن تومەندەدى. ايەلدەردىڭ ەرلەرگە قاتىستى جالاقىسى دا 2006-جىلعى 62 پايىزدان وتكەن جىلى 67 پايىزعا دەيىن كوبەيدى.
«بۇگىنگى كۇنى ايەلدەر بيزنەسىنىڭ ورىستەۋىنە «جۇمىسپەن قامتۋدىڭ جول كارتاسى-2020»، «بيزنەستىڭ جول كارتاسى-2020» مەملەكەتتىك باعدارلامالارى، سونىمەن قاتار حالىقارالىق ينستيتۋتتار مەن «دامۋ» قورىنىڭ ءتۇرلى باعدارلامالارى ءوز سەپتىگىن تيگىزۋدە»، - دەدى ول.
اۆتور: مارلان جيەمباي
