قازاقستاندىقتار سەلدەن زارداپ شەككەندەرگە 50 ميلليون تەڭگەدەن استام قارجى جينادى
زارداپ شەككەن اۋىل تۇرعىندارىنا كومەك كورسەتۋ شاراسى، سەل وتكەننەن كەيىن بىردەن قولعا الىنعان ەدى. قوعامدىق باستاما نەگىزىندە «سۋ تاسقىنىنان زارداپ شەككەن جاندارعا كومەك كورسەتۋ» اتتى شارا ىسكە اسا باستادى. قور وكىلدەرىنىڭ ايتۋىنشا، تۇسكەن قاراجاتتى جۇمساۋ ماسەلەسىمەن مەملەكەتتىك قۇرىلىمدار مەن بيزنەس پەن قوعامدىق ۇيىمداردىڭ وكىلدەرىنەن قۇرىلعان ارنايى كوميسسيا اينالىساتىن بولادى.
«ازاماتتار، ۇيىمداردىڭ وكىلدەرى قوڭىراۋ شالىپ، بىزگە كومەكتەرىن ۇسىنىپ جاتىر. ماسەلەن، بۇگىن زالالسىزداندىرۋ ورتالىعىنان وزەن ارناسىن قاۋىپسىزدەندىرۋ ءۇشىن قارجىلاي كومەك كورسەتۋ تۋرالى ۇسىنىس كەلىپ ءتۇستى. سونداي-اق بۇگىن ناۋرىزباي اۋدانىنىڭ اكىمدىگىنەن اسكەريلەردى تاماقتاندىرۋعا قارجىلاي كومەك كورسەتۋ تۋرالى ءوتىنىش كەلدى. قازىر سەل جۇرگەن جەردە 836 اسكەري جۇمىس ىستەۋدە، ولاردى تاماقتاندىرۋ ماسەلەسىن شەشى ءۇشىن قارجىلاي كومەك قاجەت. ونى كوميسسيا قاراستىرىپ، قانداي شەشىم قابىلداسا، ءبىز سوعان وراي قاراجات بولەمىز»، - دەيدى «جاڭا الاتاۋ» قوعامدىق قورىنىڭ ديرەكتورى ايدار بالابەكوۆ.
