ەلىمىزدەگى قىلمىستىڭ 50 پايىزعا جۋىعىن جاستار جاسايدى - ب. ساپاربايەۆ
بۇل تۋرالى بۇگىن ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە وتكەن «ەلباسىمەن بىرگە جاستاردىڭ قادامى» فورۋمىندا ق ر پرەمەر-ءمينيسترىنىڭ ورىنباسارى بەردىبەك ساپاربايەۆ ايتتى.
«سوڭعى كەزدەرى ءبىز جاستار اراسىنداعى قىلمىستىڭ كۇشەيىپ كەتكەنى تۋرالى كوپتەگەن مالىمەتتەر الامىز. رەسپۋبليكا بويىنشا ورىن الاتىن قىلمىستاردىڭ 50 پايىزعا جۋىعى جاستاردىڭ قولىمەن جاسالادى. بىلتىر 2013-جىلمەن سالىستىرعاندا قىلمىستىلىق 12 پايىزعا ارتتى. ماسەلەن، 2014-جىلى 12 مىڭنان استام جاس سوتتالدى. بۇل - وتە كوپ»، - دەدى ب. ساپاربايەۆ.
ونىڭ ايتۋىنشا، جاستار اراسىنداعى قىلمىس بويىنشا شىعىس قازاقستان وبلىسى، الماتى قالاسى، الماتى وبلىسى، قاراعاندى وبلىسى الدىڭعى قاتاردا تۇر. وسىلاردى ايتاي كەلە، ب. ساپاربايەۆ فورۋمعا قاتىسىپ وتىرعان وبلىس اكىمدەرىنىڭ ورىنباسارالارىن جاستارمەن جۇمىستى جاقسارتۋعا شاقىردى.
سونىمەن قاتار، ۆيتسە-پرەمەردىڭ ايتۋىنشا، جاستاردىڭ قىلمىسقا كوپ بارۋىنا ولاردى جۇمىسپەن قامتۋدىڭ تومەن دەڭگەيى دە اسەر ەتەدى.
ماسەلەن، سوڭعى 3 جىلدا 21 مىڭ كوللەدج تۇلەگى مەن 35 مىڭ ج و و تۇلەگى جۇمىس تابا الماي ءجۇر.
ب. ساپاربايەۆ، سونداي-اق، جاستار اراسىندا سالاۋاتتى ءومىر سالتىن كەڭ كولەمدە ناسيحاتتاۋدىڭ ماڭىزدىلىعىن دا اتاپ ءوتتى. ونىڭ مالىمەتىنشە، جاستاردىڭ تەك 13 پايىزى عانا تۇراقتى تۇردە سپورتپەن اينالىسادى. ال وقۋشىلاردى مەكتەپتەردە سپورت ۇيىرمەلەرىمەن قامتۋ دەڭگەيى دامىعان ەلدەردەن 4 ەسە كەم.
اۆتور: ءابۋ-اسقار مەكەش ۇلى
