اۋەجاي ءۇشىن بولعان ۇرىستا 50 ادام قازا تاپتى

استانا. قازاقپارات - ليۆيا استاناسىنىڭ اۋەجايىن باقىلاۋ ءۇشىن تالاسقان توپتاردىڭ قارۋلى قاقتىعىسىنان ءبىر اپتا ىشىندە بارلىعى 50 گە جۋىق ادام قازا تاۋىپ، 120 ادام جاراقاتتاندى. بۇل تۋرالى ليۆيا دەنساۋلىق ساقتاۋ مينيسترلىگى مالىمدەدى، دەپ حابارلادى «يتار-تاسس».

بۇعان دەيىن 18 شىلدەدە بىتىمگە كەلگەندەردىڭ جانجالى قايتا ءورشىپ، جەكسەنبى كۇنى اۋەجاي جانىنداعى كاسر بەن- عاشير اۋدانىندا اتىس باستالعان.

اۋەجايعا يەلىك ەتۋ ءۇشىن گەنەرال حاليف حافتاردى قولدايتىن «زينتاندىق بريگادا» دەپ اتالاتىن قارۋلى توپ پەن ءدىنشىل ەكسترەميستىك توپ تالاسىپ كەلەدى.

قارۋلى قاقتىعىس كەسىرىنەن ونداعى ۇشاقتارعا زاقىم كەلگەن. سونىمەن قاتار، باقىلاۋ-ديسپەتچەرلىك پۋنكتى مەن كىرە بەرىس جول جانە وزگە دە سول ماڭداعى نىساندار زارداپ شەككەن.