ەلىمىزدە قازاقستان ازاماتتىعىن الماعان 50 مىڭعا جۋىق ورالمان تۇراقتى تۇرىپ جاتىر
بۇل تۋرالى ءماجىلىستىڭ الەۋمەتتىك-مادەني دامۋ كوميتەتىنىڭ ىشكى جانە سىرتقى كوشى-قون ماسەلەلەرى تالقىلانعان وتىرىسىندا ق ر ىشكى ىستەر مينيسترلىگى كوشى-قون پوليتسياسى دەپارتامەنتىنىڭ باستىعى سەرىك سايىنوۆ ايتتى.
«قازاقستاندا 165 مىڭعا تارتا شەتەلدىك ازاماتتار تۇراقتى تۇردە تۇرىپ جاتىر. بۇلاردىڭ باسىم كوپشىلىگى رەسەيدىڭ (65 مىڭ ازامات)، وزبەكستاننىڭ (40 مىڭ)، قىرعىزستاننىڭ (14 مىڭ)، تۇركيانىڭ (2,5 مىڭ) جانە گەرمانيانىڭ (1 مىڭ 800) ازاماتتارى. سونىمەن قاتار ەلىمىزدە تۇراقتى تۇردە تۇراتىن شەتەلدىكتەردىڭ ۇشتەن ءبىر بولىگىن ءالى ازاماتتىق الماعان ورالماندار قۇرايدى. ولاردىڭ سانى 50 مىڭعا جۋىق»، - دەدى س. سايىنوۆ.
سونىمەن بىرگە، دەپارتامەنت باسشىسىنىڭ ايتۋىنشا، جىل سايىن كوشى-قون پوليتسياسى ميلليوننان استام شەتەلدىك ازاماتتى تىركەيدى. بۇدان بولەك، تىركەۋگە مىندەتتى ەمەس 6-7 ميلليون شەتەلدىك ازامات كەلەدى. ال تىركەلگەندەردىڭ جالپى سانىنىڭ ميلليونعا جۋىعى ت م د ەلدەرىنىڭ، اتاپ ايتقاندا 400 مىڭى - وزبەكستان، 200 مىڭى - رەسەي جانە 100 مىڭى - قىرعىزستان ازاماتتارى.
«ميگرانتتاردىڭ باسىم كوپشىلىگى الماتى قالاسىندا، الماتى، وڭتۇستىك قازاقستان، ماڭعىستاۋ وبلىستارى مەن استانادا تىركەلگەن»،-دەدى كوشى- قون سالاسىنىڭ باسشىسى.
اۆتور: قانات مامەتقازى ۇلى
