بيىل 500 گە جۋىق جامبىلدىق قازاقستاننىڭ سولتۇستىگى مەن شىعىسىنا قونىس اۋداردى
تاراز. قازاقپارات - جىل باسىنان بەرى جامبىلدىق 175 وتباسى، بارلىعى 497 ادام سولتۇستىك قازاقستان، پاۆلودار، شىعىس قازاقستان، قوستاناي وبلىستارىنا قونىس اۋدارعان، دەپ حابارلايدى قازاقپارات.
كەيىنگى ءۇش جىلعا جۋىق ۋاقىتتا ەلىمىزدىڭ سولتۇستىگى مەن شىعىس ايماقتارىنا 400 دەن استام جامبىلدىق وتباسى قونىس اۋدارعان. بۇل «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 -جىلدارعا ارنالعان «ەڭبەك» باعدارلاماسى اياسىندا جۇزەگە اسىرىلۋدا. بۇل رەتتە ازاماتتاردىڭ تۇرمىس احۋالىن جاقسارتۋ ماقساتىندا اتالعان باعدارلاما شەڭبەرىندە «ەڭبەك رەسۋرستارىنىڭ ۇتقىرلىعىن ارتتىرۋ»، ياعني جۇمىس كۇشى تاپشى وڭىرلەردى جۇمىس كۇشىمەن قامتاماسىز ەتۋ ءۇشىن ءوز ەركىمەن جۇمىسشى كۇشىنە سۇرانىس كوپ ايماقتارعا قونىس اۋدارۋعا جاردەمدەسۋ ەسەبىنەن قاراستىرىلعانىن اتاپ وتكەن ءجون.
«ءبىز بۇل باعىتتى حالىق اراسىندا كەڭ كولەمدە ءتۇسىندىرۋ جۇمىستارى تۇراقتى تۇردە جۇرگىزىلىپ كەلەدى. اعىمداعى جىل باسىنان بەرى قاراشا ايىنا دەيىن سولتۇستىك وڭىرلەرگە 175 وتباسى، 497 ادام قونىس اۋداردى. اتاپ ايتساق، سولتۇستىك قازاقستان وڭىرىنە – 61، پاۆلودار وبلىسىنا – 23، شىعىس قازاقستانعا – 48، قوستاناي جاققا - 43 وتباسى كوشىپ باردى. قونىس اۋدارعان وتباسىلارعا تولىعىمەن قابىلداۋشى وڭىرلىك كۆوتاسىنا ەنگىزىلىپ، بارلىق مۇشەلەرىنە سۋبسيديالار تولەندى جانە ولار جالدامالى تۇرعىن ۇيمەن قامتىلعان»، - دەيدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى تيمۋرجان نۇرىمبەتوۆ.
بۇگىنگە دەيىن سولتۇستىك پەن شىعىسقا قونىس اۋدارۋشىلاردىڭ اراسىنداعى جۇمىسقا قابىلەتتى 254 ازاماتتىڭ 151 ى تۇراقتى جۇمىسقا ورنالاسقان. سول سياقتى كوشىپ بارعان وتباسىلاردىڭ ىشىندەگى 15-29 جاس ارالىعىنداعى 114 جاسقا دا قولداۋ كورسەتۋ جولدارى قاراستىرىلعان دەسەك، مەكتەپ جاسىنداعى جانە مەكتەپ جاسىنا دەيىنگى 207 بالا بالاباقشا جانە مەكتەپ ورىندارىمەن قامتاماسىز ەتىلىپتى.
«اتالعان ايماقتارعا كوشۋگە وبلىستىڭ اسىرەسە قورداي، بايزاق، جامبىل اۋداندارى مەن تاراز قالاسىنىڭ تۇرعىندارى ءجيى نيەت بىلدىرەدى. ولاردىڭ باسىم كوپشىلىگى جەر الىپ، ديحانشىلىقپەن اينالىسقىسى كەلەتىندەر. كوشەتىن ازاماتقا 35 ايلىق ەسەپتىك كورسەتكىش ەسەبىندە كوشۋ سۋبسيدياسى بەرىلەدى. ول كوشەتىن وتباسىنىڭ ءاربىر مۇشەسىنە تولەنەدى. بارعان جەرىندە ءوزى تاڭداپ بارعان ماماندىعى بويىنشا مىندەتتى تۇردە تۇراقتى جۇمىسقا ورنالاستىرىلادى. ەڭ باستى ماسەلە كوشىپ بارعاندا باسپانا ۇسىنىلادى. ول باسپانانى جالعا الۋ اقىسىن دا ءبىر جىلعا دەيىن مەملەكەت تولەپ بەرەدى»، - دەيدى ت. نۇرىمبەتوۆ.
اۆتور: عيبرات سەمباي
