الماتىدا جەر تەلىمدەرىن ساتىپ الۋعا بيۋدجەتتەن 500 ميلليون تەڭگە ءبولىندى
«الماتى قالاسىنىڭ باس جوسپارىنا سايكەس سولتۇستىك باعىتتاعى نەگىزگى ماگيسترالدارداعى جۇكتەمەنى تومەندەتۋ ماقساتىندا الماتى قالاسىنىڭ اكىمدىگى تاراپىنان سەيفۋللين مەن جانسۇگىروۆ كوشەلەرى قيىلىسىندا كولىك جول ايىرىعىن سالۋ تۋرالى شەشىم قابىلداندى»، - دەلىنگەن الماتى قالاسى اكىمدىگىنىڭ باسپا ءسوز قىزمەتى تاراتقان اقپاراتتا.
كولىك جول ايىرىعىن سالۋ جوسپارلانعان اۋداندا 259 جەر تەلىمى بار، ولاردى ساتىپ الۋ كەزەڭ- كەزەڭىمەن جۇزەگە اسىرىلاتىن بولادى. «2017 -جىلدىڭ 6 -ناۋرىزىندا الماتى قالالىق جەر قاتىناستارى باسقارماسىمەن مەنشىك يەلەرىنە الماتى قالاسى اكىمدىگىنىڭ قاۋلىسى قابىلدانعاندىعى تۋرالى ەسكەرتۋ مەن جەر تەلىمدەرىن ساتىپ الۋ كەلىسىمشارتىنىڭ جوباسى جىبەرىلدى. اتالعان كەلىسىمشارت جوباسىندا كورسەتىلگەن وتەماقى سوماسى قازاقستان رەسپۋبليكاسىنىڭ «مەملەكەتتىك مۇلىك تۋرالى» زاڭىنىڭ تالاپتارىنا تولىقتاي سايكەس كەلەدى»، - دەپ اتاپ وتەدى اكىمدىكتەن.
سونىمەن قاتار اكىمدىك تاراتقان اقپاراتتا كەلىسىمشارت جوباسىندا كورسەتىلگەن وتەماقى سوماسى سوڭعى ۇسىنىس ەمەستىگى حابارلانعان. «2017 -جىلعا ارنالعان رەسپۋبليكالىق بيۋدجەتتى ناقتىلاۋ اياسىندا جەر تەلىمدەرىن ساتىپ الۋعا 500 ميلليون تەڭگە مولشەرىندە قارجى قاراستىرىلعان. اتالعان سوما الدىن الا بەكىتىلىپ وتىرعان قارجى جانە جەر تەلىمدەرىن الۋ جانە وتەماقىنىڭ ناقتى سوماسىن ايقىنداۋ پروتسەدۋراسى، ونىڭ ىشىندە سوت تارتىبىمەن دە اياقتالعاننان كەيىن بيۋدجەت قارجىسى وتەماقىنىڭ ناقتى سوماسىنا سايكەس تۇزەتىلەتىن بولادى»، - دەپ ناقتىلادى اكىمدىكتەن.
