قازاقستاندىق ازامات 500 ليتردەن ارتىق قان تاپسىرعان
دونورلىق - ادام ءومىرىن ساقتاپ قالاتىن ىنتىماقتىڭ ەرلىك اكتىسى دەپ تەگىن ايتىلماسا كەرەك. ويتكەنى، ميلليونداعان ادام ومىرلەرىندە وزدەرى ەشقاشان كورمەگەن، وتەۋىنە ەشقانداي اقى دامەتپەي، ءوز ەرىكتەرىمەن قان تاپسىرعان ادامداردىڭ الدىندا قارىزدار. تاجىريبە كورسەتكەندەي، اقىسىز دونورلاردىڭ تاپسىرعان قانى ەڭ قاۋىپسىز بولىپ كەلەتىنىن ەسكەرسەك، جىل سايىن 14 ماۋسىمدا دونورلار كۇنى الەمدىك دەڭگەيدە اتالىپ وتىلەدى. اتالمىش داتا ادام قانىنىڭ توپتارىن اشقان، نوبەل سىيلىعىنىڭ لاۋرەاتى كارل لاندشتەينەردىڭ تۋعان كۇنىنە وراي بەلگىلەنگەن ەكەن.
ءبىر ايتا كەتەرلىگى، بۇل يماندى شارا ءار جىلى ءار تاقىرىپتا وتەدى. ماسەلەن، بيىلعى دۇنيەجۇزىلىك دونور كۇنى وتەۋسىز قان تاپسىرۋعا شەشىم قابىلداپ، ەرلىك جاساعان ادامدارعا العىس پەن ريزاشىلىق رەتىندە «مەنىڭ ومىرىمە اراشا بولعانىڭا راحمەت!» تاقىرىبىمەن وتكىزىلدى.
«باۋىرجان» قوعامدىق قورى مەن «قازاقستان قىزىل جارتى ايى» قوعامدىق بىرلەستىگى «سامسۋنگ» كومپانياسىمەن بىرلەسە وتىرىپ، «سەنىڭ كۇنىڭ، دونور!» ۇرانىمەن ەلىمىزدە اقىسىز دونورلىقتى دامىتۋ جانە ناسيحاتتاۋ اكسياسىن وتكىزگەنىن اتاپ وتكەنىمىز ءجون. بۇعان رەسپۋبليكاعا بەلگىلى بەدەلدى ازاماتتار، شوۋ-بيزنەستىڭ، قوعامدىق ۇيىمداردىڭ وكىلدەرى، قازاقستاننىڭ قۇرمەتتى دونورلارى قاتىسقان. وسى رەتتە بيىلعى ايتۋلى داتادا مىڭىنشى قان تاپسىرعان ەلىمىزدىڭ قۇرمەتتى دونورى الەكساندر سكاكوۆسكيدى ەرەكشە اتاپ وتكەنىمىز ءجون.
بۇل وتانداسىمىز دوناتسيا سانى جاعىنان اۆستراليا تۇرعىنى دجەيمس حارريسوننان كەيىن الەمدە وتەۋسىز دونورلىقتان ەكىنشى ورىندى يەلەنۋى كوڭىلگە قۋانىش ۇيالاتادى. مەيىرىمدى ءىسىن 1971-جىلدان باستاعان ول - قان ورتالىعىنا 1 ايدا 4 رەت كەلۋدى ادەتكە اينالدىرعان. وسىلايشا ول 500 ليتردەن ارتىق قان تاپسىرىپ ۇلگەرگەن.
- مەن جاستايىمنان ىشىمدىك پەن شىلىمعا ەش اۋەستەنبەدىم. ەڭ العاش رەت جاس انا مەن بالانىڭ ءومىرىن ولىمنەن اراشالاپ قالدىم. بۇل ءىسىمدى 1971-جىلدىڭ 12-شىلدەسىندە باستاعانمىن. بولاشاقتا دا ەرىكتى پلازمالىق جانە يممۋندىق قان تاپسىرۋشى بولىپ قالا بەرەمىن. وسىنداي كوپ مولشەردە قان تاپسىرعانىما قاراماستان ءوزىمدى جاس، ءارى جاقسى سەزىنەمىن»، - دەيدى وتانداسىمىز.
بۇگىندە الەم بويىنشا اۆستراليالىق دجەيمس حارريسون دونورلىقتان ەشكىمگە دەس بەرمەي كەلەدى. ول وسى كۇنگە دەيىن 1036 رەت قان تاپسىرىپتى. الەكساندر سكاكوۆسكي بولسا وتانداسىمىز دجەيمستەن 9 جاسقا كىشى بولعاندىقتان، بۇل كورسەتكىشتى ءالى جاڭعىرتامىن دەپ وتىر. قۇرمەتتى دونوردىڭ تاماقتانۋى دا كوپتەن ەش ەرەكشەلەنبەيتىن كورىنەدى. ءوزى قانىن بەرىپ، ءولىم اۋزىنان امان ساقتاپ الىپ قالعان جاس ءسابي بيىل 41 جاسقا كەلىپتى.
- مۇنداي ادامدار وتە سيرەك. ول كىسى قازاقستان ەمەس، بۇكىل الەم بويىنشا ەكىنشى ورىندا تۇر. ەندى وسى كىسىلەردەن، وسىنداي دونورلاردان ۇلگى العان ءبىزدىڭ جاستارىمىز دا سونداي كورسەتكىشكە ۇمتىلادى دەپ ەسەپتەيمىن»، - دەيدى رەسپۋبليكالىق قان ورتالىعى ديرەكتورىنىڭ ورىنباسارى گۇلسارا بەكمۇحايەۆا.
جالپى العاندا الماتى قالاسى بويىنشا ءار جىل سايىن 40 مىڭنان استام دونور قان تاپسىرادى. ءبىر عانا قان ورتالىعىنا 2013-جىلى 13774 دونور كەلسە، وتكەن جىلى 16 مىڭنان استام تۇرعىن قان وتكىزگەن. بۇل كورسەتكىش جىل سايىن 16 پايىزعا ارتۋدا. سوڭعى جىلى تۇراقتى قان تاپسىرۋشىلار سانى 2 پايىزعا وسسە، العاش رەت كەلۋشىلەر سانى 9 پايىزعا ءوسىپتى.
